यंदा हिंदमाता तुंबणार नाही? पावसाळ्यापूर्वी पालिका करणार 'हे' काम

मुंबई: मुंबईतील हिंदमाता परिसर... पावसाळ्यात या परिसरात पाणी तुंबलं नाही असं कधी होत नाही. थोड्या पावसानेही दादर मधील हिंदमाता परिसरात पूरसदृश्य परिस्थिती तयार होत असते. त्यामुळे या परिस्थिती पासून म्हणजेच पुरापासून हिंदमाताकरांची सुटका करण्यासाठी पालिका आता भूमिगत टाक्या उभारणार आहे.

थोड्या पावसानं तुंबणाऱ्या पाण्यामुळे या परिसरातील लोक पावसाळ्यात त्रस्त असतात. स्थानिकच नाहीत तर रस्त्यावरील वाहनांना देखील अडचणी येत असतात. येथील भाग खोलगट असल्यामुळे काही केल्या पावसाळ्यात भरलेल्या पाण्याचा निचरा लवकर होत नाही. यामुळे समाज माध्यमांवर या प्रकारावरून पालिकेला मोठ्या टिकेचा सामना करावा लागतो.

मुंबई विभागातल्या ताज्या बातम्या वाचण्यासाठी येथे क्लिक करा.

दरवर्षी अतिवृष्टीत पाणी तुंबल्यामुळे होणार्‍या गैरसोयीतून हिंदमाताकरांची सुटका करण्यासाठी पालिका जवळच्याच सेंट झेवियर्स फुटबॉल मैदान आणि प्रमोद महाजन मैदानात दोन मोठे भूमिगत टँक आणि इथे असलेल्या पुलाखाली खाली तीन छोटे टँक बांधणार आहे. हिंदमाता पाणी भरल्यानंतर हे पाणी समुद्रात भरती असताना पाणी समुद्रात सोडता येत नाही, अशा वेळी हे पाणी या टाक्यांमध्ये सोडलं जाईल. मग भरती ओसरल्यानंतर हे पाणी पर्जन्य जलवाहिन्यांमधून नजिकच्या नाल्यांमधून नदी-समुद्रात सोडण्यात येणार आहे.

या प्रकल्पासाठी पालिका १३० ते १४० कोटींचा खर्च करणार आहे. तर पावसाळ्यापूर्वी हे काम पूर्ण करण्याचा पालिकेचा मानस आहे. ही संकल्पना याआधी टोकियोत राबवण्यात आली होती. त्याच धर्तीवर मुंबईत हा प्रकल्प राबवण्यात येत आहे. जर हा प्रकल्प यशस्वी झाला तर मुंबईत इतर पाणी तुंबणार्‍या ठिकाणी हा उपक्रम राबवण्यात येणार आहे.

हेही वाचा- Hemant Nagrale: नवी मुंबई पोलिस आयुक्त असताना झाले होते निलंबन

Bombay Municipal Corporation build underground tanks at Hindmata work before rains