Mumbai News : मध्य रेल्वेचा हार्बर मार्ग कचऱ्यात

Mumbai News : मध्य रेल्वेच्या हार्बर मार्गालगत कचऱ्याचे ढीग पडून आहेत. त्याकडे मध्य रेल्वे आणि महापालिका प्रशासनाकडून दुर्लक्ष केले जात असल्याने रेल्वे प्रवाशांसह सार्वजनिक आरोग्य धोक्यात आले आहे, असा आरोप करीत समाजसेवक हितेंद्र गांधी यांनी महाराष्ट्र राज्य मानवी हक्क आयोगाकडे तक्रार दाखल केली आहे.

मध्य रेल्वेच्या हार्बर मार्गावरील विशेषतः चुनाभट्टी ते सीएसटी स्थानकांदरम्यान रेल्वे रुळांवर प्लास्टिक कचऱ्याचा ढीग जमा झाला आहे. प्लास्टिकच्या पिशव्या, थर्माकोलचे तुकडे, कागदांचे तुकडे आणि लगदे यांनी रेल्वे रूळ झाकून गेले आहेत.

वारंवार तक्रार करूनदेखील हा प्लास्टिक कचरा उचलला जात नसल्याने कचऱ्याचा डोंगर तयार झाला आहे. त्यामुळे परिसरात दुर्गंधी पसरली आहे. येथून निघणाऱ्या हानीकारक धुरामुळे प्रवाशांना श्वसन आणि त्वचा यांचे आजार होण्याची शक्यता आहे. सध्या पावसाळा सुरू असल्याने हा कचरा ड्रेनेजला अडथळा निर्माण करतो आहे आणि रोगांचे संभाव्य धोके वाढवत आहे. ही परिस्थिती दिवसेंदिवस अधिकच बिकट होत असून सार्वजनिक आरोग्य धोक्यात आले आहे.

यासंदर्भात २५ ऑगस्टला हितेंद्र गांधी यांनी महाराष्ट्र राज्य मानवी हक्क आयोगाकडे तक्रार दाखल केली आहे.

यासंदर्भात मध्य रेल्वेच्या जनसंपर्क विभागाकडे चौकशी केली असता त्यांनी माहिती घेऊन तुम्हाला कळवतो, असे सांगितले.

कारवाई करण्याची मागणी

हितेंद्र गांधी यांनी चमेली देवी विरुद्ध यूपी राज्य (२००३) आणि एम. सी. मेहता विरुद्ध युनियन ऑफ इंडिया (१९८६) सारख्या प्रकरणांचे दाखले देत महाराष्ट्र राज्य मानवी हक्क आयोगाला सर्वसमावेशक चौकशी करण्याची विनंती केली आहे. यासोबतच रेल्वे प्रवाशांचे आरोग्य आणि हक्क राखण्याच्या महत्त्वावर जोर दिला. संबंधित अधिकाऱ्यांवर कारवाई करण्याची मागणीही गांधी यांनी केली आहे.