बोनसची घोषणा न झाल्यास "चक्का जाम'; रेल्वे कर्मचाऱ्यांकडून मंगळवारी देशभरात विरोध प्रदर्शन 

मुंबई ः ऑल इंडिया रेल्वेमन फेडरेशनच्या (एआयआरएफ) बैठकीत बोनसची मागणी करण्यात आली आहे. रेल्वे मंत्रालयाने 21 ऑक्‍टोबरपर्यंत बोनसची घोषणा न केल्यास 22 ऑक्‍टोबरला "चक्का जाम' करण्याचा इशारा एआयआरएफचे महामंत्री शिवगोपाल मिश्रा यांनी दिला आहे. तसेच मंगळवारी देशभरात बोनस दिवस साजरा करून विरोध प्रदर्शन करण्यात येणार असल्याचेही त्यांनी सांगितले. 

युरोपात घुमले वसईचे सुर, भावाच्या लग्नात बहिणीची अनोखी भेट

बोनस, खासगीकरण, जुनी पेंशन योजना, डीए, रात्रपाळी भत्ता अशा विविध मागण्यांवर एआयआरएफच्या बैठकीत चर्चा करण्यात आली. बैठकीतील सर्व मागण्यासंदर्भात रेल्वेमंत्री, रेल्वे मंडळाच्या मुख्य कार्यकारी अधिकाऱ्यांसह, सचिवांशीदेखील चर्चा करण्यात आली. मागण्या मान्य करण्यात येत असल्या, तरी अद्याप त्यासंबंधी घोषणा होत नसल्याने रेल्वे कर्मचाऱ्यांकडून संताप व्यक्त करण्यात येत आहे. कोरोनामुळे कर्मचाऱ्यांना आर्थिक अडचणींचा सामना करावा लागत असल्याने सणासुदीच्या काळात बोनस मिळण्याची अपेक्षा व्यक्त केली जात आहे. यापूर्वी दुर्गापूजेपूर्वीच रेल्वेच्या बोनसची घोषणा केली जात होती; मात्र अद्याप बोनसची घोषणा झाली नसल्याने कर्मचाऱ्यांमध्ये चिंतेचे वातावरण आहे. त्यामुळे 20 ऑक्‍टोबरला बोनस दिवस साजरा करून रेल्वे कामगार युनियनच्या वतीने देशभरात विरोध प्रदर्शन करण्यात येणार आहे, असेही मिश्रा यांनी सांगितले. 

---------------------------------------------- 

( संपादन - तुषार सोनवणे )