मालवणीतील चाळींना पुराचा धाेका

मालवणीतील चाळींना पुराचा धोका
गटारांची साफसफाई करण्याची मागणी
मालाड, ता. २६ (बातमीदार) ः मे महिन्याचा चौथा आठवडा संपला तरीही गटारांची साफसफाई अपूर्णच असल्‍याने मालवणी परिसरातील चाळींमध्ये पावसाळ्यात पाणी शिरण्याची भीती आहे. त्‍यामुळे लवकरात लवकर गटारांची साफसफाई करावी, अशी मागणी येथील रहिवासी करीत आहेत.
मालवणीतील सानेगुरुजी वसाहत जलमय होण्याची भीती येथील रहिवाशांनी व्यक्‍त केली. महत्त्वाच्या गटारांची पालिकेने जाणूनबुजून स्‍वच्छता केली नाही, असा आरोप रहिवासी करीत आहेत. साने गुरुजी वसाहत क्रमांक एक ते तीन दरम्यान असलेल्या गटारांची सफाई अद्याप झालेली नाही. त्यामुळे येथील गटारे तुंबून घाण पाणी रहिवाशांच्या दारासमोर येत आहे. पसरलेल्‍या दुर्गंधीमुळे घरात राहणे अशक्‍य झाल्‍याचे रहिवाशांनी सांगितले. त्यातच मच्छरांचा त्रासही वाढला आहे. याच परिसरात गुरुद्वारा, मशीद आणि खासगी रुग्णालय आहे. शहीद अब्दुल हमीद रोड ते बेकरी, एकता चाळ, पटेल कंपाऊंड, रशीद खान कंपाऊंड, गुजराती चाळ, गुडलक चाळ, जलनिधी चाळ, गुजराती चाळीलगतच्या गटारांची साफसफाई झालेली नाही. त्‍यामुळे पावसाळ्यात गटारे तुंबून पाणी घरात शिरण्याची भीती रहिवाशांना सतावत आहे.

अद्याप गटारांची साफसफाई झालेली नाही. त्‍यामुळे आमच्या घरात यंदा पावसाळ्यात गटाराचे पाणी शिरण्याची शक्‍यता आहे.
- रोशनी शेख, स्‍थानिक रहिवासी