पवारांच्या खेळीनंतर काँग्रेसकडून नवा 'गेम', दोघांनी शिवसेनेचं टेन्शन वाढवलं

महाराष्ट्रात राज्यसभेच्या सहाव्या जागेवरून राजकारण चांगलंच पेटलं आहे. भाजपने धनंजय महाडिकांना मैदानात उतरवल्यानंतर चुरस वाढली आहे. सध्या मविआ आणि भाजपचे सर्व आमदार विविध ठिकाणी रिसॉर्ट्सवर दाखल झाले आहेत.

एकही मत फुटू नये यासाठी सर्व पक्ष काळजी घेत आहेत. मात्र, कोर्टाच्या निर्णयाने राष्ट्रवादीच्या नवाब मलिक आणि अनिल देशमुखांना मतदान करता येणार नाही. त्यामुळे शरद पवार यांनी रात्रीतून कोटा वाढवल्याचं बोललं जातंय. आता काँग्रेसनेही त्यांच्या सर्व आमदारांना पाठिशी उभं केलं आहे. (Rajyasabha Election 2022)

सर्वांत पहिले राष्ट्रवादीच्या आमदारांनी मतदान केलं. यानंतर काँग्रेस आणि शिवसेनेच्या नेत्यांनी मतदान केलंय. राष्ट्रवादीकडून आमदार सुनिल तटकरे आणि मंत्री जयंत पाटील, शिवसेनेकडून सुनिल प्रभू आणि काँग्रेसकडून मंत्री अशोक चव्हाण पोलिंग एजंट आहेत. मात्र मतांच्यां कोट्यावरून ऐनवेळी सूत्र फिरवली जात असल्याचं दिसतंय.

मतांचा तुटवडा आणि कोणताही धोका टाळण्यासाठी राष्ट्रवादी काँग्रेसने मतदानाचा कोटा वाढवला. आता काँग्रेसनेही हीच खेळी करत त्यांचे सर्व आमदार म्हणजेच एकूण ४४ जण इम्रान प्रतापगढी यांच्या दिमतीला उतरवले आहेत. ४२ मतांचा कोटा असताना काँग्रेसने देखील दोन मतं अधिकची ठेवली आहेत. त्यामुळे शिवसेना उमेदवाराची पहिल्या पसंतीची चार मतं कमी होणार आहेत. आता सेनेच्या दुसऱ्या उमेदवाराची चिंता वाढल्याचं म्हटलं जातंय.