Mumbai Hotspots: मुंबईतील 'हे' चार विभाग पुन्हा हॉटस्पॉटच्या दिशेने

मुंबई: नियंत्रणात आलेल्या मुंबईत पुन्हा एकदा कोरोना बाधित रुग्णांची संख्या वाढू लागली आहे. उपनगरातील 4 विभागात कोरोना रुग्णांची संख्या पुन्हा वाढू लागली असून हे विभाग पुन्हा एकदा कोरोना हॉटस्पॉट होण्याच्या दिशेने वाटचाल करत असल्याचं दिसते.

मुंबईत 1 फेब्रुवारी पासून लोकल ट्रेन सेवा सुरू झाली. लोकांची गर्दी वाढू लागली. परिणामी जानेवारी पर्यंत नियंत्रणात आलेली रुग्णसंख्या फेब्रुवारीच्या पहिल्या आठवड्यात वाढू लागली. के पूर्व (अंधेरी पूर्व, जोगेश्वरी), टी  विभाग (मुलुंड), आर मध्य (बोरिवली), एम पश्चिम ( चेंबूर, टिळक नगर) या चार वॉर्डमध्ये रुग्णसंख्या वाढत आहे. या विभागांमध्ये रोज नवीन रुग्णांची संख्या 10 ते 15 टक्के वाढत आहे. चेंबूर, टिळक नगर आणि मुलुंड या भागात रुग्ण संख्या वाढीचा दर सर्वाधिक 0.26 टक्के आहे. चेंबूरमध्ये सरासरी 20 रुग्ण आढळत असून मुलुंडमध्ये रोज सरासरी 40 रुग्ण आढळत आहेत.

हेही वाचा- Mumbai Rain: मुंबईत सोसाट्याच्या वाऱ्यासह पावसाच्या सरी, वादळी वाऱ्यासह पावसाचा अंदाज
 

मुंबईत रोज आढळणाऱ्या नवीन रुग्णांची

संख्या जानेवारीच्या पहिल्या आठवड्यात 350 ते 400 होती. फेब्रुवारीपासून यात पुन्हा वाढ होऊन ही संख्या 500 वर पोहोचली आहे. मुंबईतील रुग्णवाढीचा दर गुरुवारी आणखी वाढला असून आता हा दर 0.17 टक्क्यांवर गेला आहे. गेल्या आठवड्याभरात हा दर 0.12 टक्के होता. त्या तुलनेत चार विभागांतील रुग्णवाढीचा दर अधिक आहे. गुरुवारी 736 नव्या रुग्णांची नोंद झाली तर 4 रुग्णांचा मृत्यू झाला. उपचाराधीन रुग्णांची संख्याही वाढू लागली आहे.

मुंबई महापालिकेने नियमांची कठोर अंमलबजावणी करण्यासाठी रहिवासी इमारतींना नोटीसा देखील बजावल्या आहेत. मुंबईत सार्वजनिक ठिकाण, विवाह कार्यालये, बाजार, गर्दीची ठिकाणी कोरोना नियमांची कडक अंमलबजावणी करण्यात येणार आहे.

मुंबई विभागातल्या ताज्या बातम्या वाचण्यासाठी येथे क्लिक करा.

इमारतीत बाहेरून येणाऱ्या व्यक्तींचे स्क्रीनिंग करण्याच्या आणि कमीत कमी लोकांना इमारतीत प्रवेश देण्याच्या सूचनाही देण्यात आल्या आहेत. पालिकेने एम वेस्ट वॉर्ड मध्ये 550 इमारतींना नोटीसा दिल्या आहेत. मुंबईत सध्या 258 इमारती सील आहेत. यांपैकी एन विभागात (घाटकोपर) मध्ये सर्वाधिक 107 इमारती सील केल्या आहेत. मुंबईत सध्या कंटेंटमेंट झोनची संख्या 57 आहे. 

---------------------------

(संपादन- पूजा विचारे)

Covid 19 case mumbai increase four areas hotspots marked