पनवेल: अंमली पदार्थाच्या गोळ्यांची विक्री करणारा तरुण अटकेत

पनवेल : मेथॅम्फेटामाईन अमली पदार्थांच्या गोळ्यांची विक्री (Methamphetamine Drug tablet) करणाऱ्या बांगलादेशी तरुणाला पनवेल तालुका पोलिसांनी (Panvel Police) सापळा रचून अटक केली. मुसा सुलतान खान (२६) (culprit arrested) असे या बांगलादेशी नागरिकाचे नाव असून पोलिसांनी त्याच्याकडून तब्बल १३ लाख २५ हजार रुपये किमतीच्या ५३० गोळ्या (tablet seized) जप्त केल्या. धक्कादायक म्हणजे मुसा खान याने भारतातील बनावट आधार कार्ड व पॅन कार्ड तयार केले होते. पश्चिम बंगाल येथील बनावट जन्म प्रमाणपत्र (fake documents) तयार करून घेतल्याचे आढळून आले.

पनवेल तालुक्यातील आपटा फाटा, खारपाडा येथे एक बांगलादेशी नागरिक मेथॅम्फेटामाईन अमली पदार्थाच्या गोळ्या विक्री करण्यासाठी येणार असल्याची माहिती पनवेल तालुका पोलिसांना मिळाली होती. त्यानुसार वरिष्ठ निरीक्षक रवींद्र दौंडकर, उपनिरीक्षक संजय गवळे आणि पथकाने शनिवारी सायंकाळच्या सुमारास सापळा लावला होता. यावेळी त्या भागात संशयास्पदरीत्या आलेल्या मुसा सुलतान खान याला पोलिसांनी ताब्यात घेऊन त्याची तपासणी केली.

त्यावेळी त्याच्याजवळ तब्बल १३ लाख २५ हजार रुपये किमतीच्या ५३० गोळ्या सापडल्या. मुसा खान याच्याकडे वसई, नालासोपारा येथील पत्त्यावरील भारतीय नागरिकत्वाचा पुरावा असलेले आधार कार्ड, आयकर विभागाकडून देण्यात येणारे पॅन कार्ड, पश्चिम बंगाल राज्यातील जन्म प्रमाणपत्र आदी कागदपत्रे आढळून आली.