रामदास कदमांच्या गैरहजेरीतही विरोधी घोषणाबाजी

मुंबई : रामदास कदम मुर्दाबाद ,रामदास कदम (Ramdas Kadam) गद्दार आहेत अशा घोषणा आज शिवसेनेच्या दसरा मेळाव्यात (Dassehra Melava) देण्यात आल्या. शिवसेनेचे पक्षप्रमुख उद्धव ठाकरे (uddhav Thackeray) यांच्या भाषणापूर्वी आज कदम यांच्या निषेधाच्या घोषणा सुरु झाल्या. कदम यांनी परिवहन मंत्री अनिल परब (Anil parab) यांच्या विरोधातील कागदपत्रे भाजपनेते किरीट सोमैयांपर्यंत (kirit somaiya) पोहोचवल्याचा आरोप आहे. या संदर्भात आपली अकारण बदनामी होते आहे. अनिल परब माझ्या सख्ख्या भावाला बरोबर घेवून माझ्या विरोधात कुभांड रचत असल्याची व्यथा मांडणारे पत्र कदम यांनी नुकतेच मुख्यमंत्री ठाकरे यांना पाठवले आहे.तरीही मी पक्षाला महत्व देत शांत असल्याचेही या पत्रात नमूद करण्यात आले आहे.

दसरा मेळाव्यात रामदास कदम यांच्यावर सैनिक खवळतील याची कल्पना अगोदरच आल्याने त्यांनी आज येवू नये यासाठी सेनेच्या वरिष्ठ वर्तुळातूनच निरोप देण्यात आले होते. रोषाचे रुपांतर अप्रिय प्रसंगात झाले तर मेळाव्याचा बेरंग होईल असे सांगत सभागृहात येवू नये ही विनंती करण्यात आली असे कदम यांच्या निकटवर्तीयांनी सांगितले. शिवसेनेवरील माझी निष्ठा अभंग आहे.तेथे मी का यायचे नाही असा सवाल करीत प्रारंभी ही विनंती कदमांनी धुडकावून लावली.पण शिवसेनेतील अंतर्गत वादाचीच चर्चा झाली तर मेळाव्यातून जो संदेश द्यायचा आहे तो जाणार नाही. भाजपच्या हाती कोलित मिळेल असे सांगत नगरविकासमंत्री एकनाथ शिंदे ,सामनाचे कार्यकारी संपादक संजय राऊत आणि सचिव मिलिंद नार्वेकर यांनी कदम यांना मेळाव्यात येणे इष्ट नसल्याचे सांगितले.आज दिवसभर सेनेत या प्रकाराची चर्चा सुरु होती.