जादा पैसे आकारणाऱ्या खासगी लॅबची मान्यता रद्द कराः महापौर

मुंबई: कोरोना चाचणीसाठी जादा पैसे आकारले जात असल्याचे निदर्शनास आले आहे. रुग्णांकडून कोरोना चाचणीसाठी जादा पैसे आकारले जात असल्यास खासगी लॅबची मान्यता रद्द करण्यात यावी, असे निर्देश महापौर किशोरी पेडणेकर यांनी सोमवारी दिले आहेत. 

राज्य सरकारनं दिलेल्या दिशानिर्देशाप्रमाणे आणि निर्धारित केलेल्या दराप्रमाणे खासगी लॅब कोरोना चाचणीचे दर न आकारता अतिरिक्त शुल्क आकारत असल्याचे निर्दशनास आले असल्याचे महापौरांनी सांगितले.

यामुळे विभागीय वैद्यकीय अधिकाऱ्यांची आज तातडीची बैठक बोलाविण्यात आली असल्याचे त्यांनी सांगितले. अतिरिक्त दर आकारणाऱ्या खासगी लॅबला वैद्यकीय अधिकाऱ्यांनी भेट देऊन संबंधित लॅबची तपासणी करण्याचे निर्देश महापौरांनी यावेळी दिले. या तपासणीत अतिरिक्त शुल्क आकारणाऱ्या लॅबला नोटीस बजावण्यात यावी तसेच समज देण्यात यावी, असे निर्देशही महापौरांनी यावेळी दिले. नोटीस बजावल्यानंतरही नियमांचे उल्लंघन करत असणाऱ्या खासगी लॅबची मान्यता रद्द करा, असे निर्देश महापौरांनी यावेळी संबंधित वैद्यकीय अधिकाऱ्यांना दिले. 

मुंबई विभागातल्या ताज्या बातम्या वाचण्यासाठी येथे क्लिक करा.

मुख्यमंत्री उद्धव ठाकरे आणि आरोग्यमंत्री राजेश टोपे यांनी वेळोवेळी दिलेल्या दिशानिर्देशाप्रमाणे बृहन्मुंबई महानगरपालिकेच्या सर्व अधिकारी/ कर्मचारी यांनी केलेल्या एकत्रित प्रयत्नातून आपण कोरोनावर नियंत्रण मिळविले आहे. त्यामुळे आपण सर्वांनी यापुढे दक्ष राहून या अवाजवी दरावर नियंत्रण मिळविण्याचे निर्देशही महापौरांनी यावेळी दिले.

हेही वाचा-  कोरोनाच्या सुरुवातीला झालेली चूक टाळण्यासाठी पालिकेकडून सक्तीचे निर्णय

दरम्यान, महानगरपालिकेनं निर्धारित केलेल्या दरापेक्षा जास्त दर आकारणाऱ्या खासगी लॅबवर अंकुश ठेवण्यासाठी मुंबईच्या महापौर किशोरी पेडणेकर यांनी महापालिकेच्या संबंधित विभागीय वैद्यकीय आरोग्य अधिकाऱ्यांची सोमवारी भायखळा, येथील वीरमाता जिजाबाई भोसले उद्यानातील पेंग्विन कक्षात आढावा बैठक घेतली. याप्रसंगी कार्यकारी आरोग्य अधिकारी डॉ. मंगला गोमारे, उप आरोग्य अधिकारी टिपरे, विभागीय वैद्यकीय आरोग्य अधिकारी उपस्थित होते.

------------------

(संपादन- पूजा विचारे)

Dismiss private labs that charge extra Mayor kishori pednekar