डोंबिवली : शुल्लक कारणावरुन रिक्षाचालकास मारहाण; 15 जणांवर गुन्हा दाखल

डोंबिवली : दुचाकीला कट मारल्याचा राग आल्याने 10 ते 15 जणांनी रिक्षाचालक तसेच त्याच्या साथीदाराला बेदम मारहाण (Rikshaw driver beaten incident) केल्याची घटना डोंबिवलीत घडली. याप्रकरणी रामनगर पोलीस ठाण्यात (Ramnagar Police Station) 10 ते 15 जणांवर गुन्हा दाखल करण्यात (Police complaint filed) आला आहे. तसेच रिक्षाचालकावर देखील अदखलपात्र गुन्हा दाखल करण्यात आला आहे.

डोंबिवली पूर्वेतील इंदिरा गांधी चौक परिसरात ही मारामारीची घटना 12 डिसेंबरला घडली. रिक्षाचालक राजेश भालेराव रस्त्यावरून जात असताना स्कुटी चालक सिद्धार्थ मोरे सोबत वाद झाला. स्कुटीला कट मारल्याचा राग सिद्धार्थला आला होता. राजेश हे आपली रिक्षा घेऊन इंदिरा चौकात आले असता, अमोल केदारे, सिद्धार्थ मोरे आणि इतर 10 ते 15 लोक इंदिरा चौकात असलेल्या रिक्षा स्टँडवर आले.

या टोळक्याने रिक्षाचालक राजेशसह त्याच्या साथीदाराला मारहाण केली. ही घटना सीसीटीव्ही मध्ये कैद झाली असून त्याआधारे रामनगर पोलीस ठाण्यात गुन्हा दाखल करण्यात आला आहे. तसेच रिक्षाचालकावर देखील अदखलपात्र गुन्हा दाखल करण्यात आला आहे. दुचाकीस्वाराला पोलिसांनी अटक केली आहे.