Drugs Case: आर्यन खानची दिवाळी कारागृहातच?

Aryan Khan Drugs Case: क्रुझवरील अमलीपदार्थ प्रकरणात अटकेत असलेला अभिनेता शाहरुख खानचा मुलगा आर्यनचा कारागृहातील मुक्काम वाढला आहे. विशेष न्यायालयाने आर्यनसह अरबाज मर्चंट आणि मुनमुन धमेचा यांचा जामीन अर्ज फेटाळला आहे. त्यामुळे उच्च न्यायालयात आता जामिन अर्ज करण्यात येईल असं त्याच्या वकिलांकडून सांगण्यात आलं. आर्यनच्या जामिनासाठी पुढील दहा दिवस खूप महत्त्वाचे असल्याचं म्हटलं जात आहे. पुढील दहा दिवसांत उच्च न्यायालयाकडून त्याला जामीन मिळाला नाही तर दसऱ्यानंतर आर्यनची दिवाळीसुद्धा आर्थर रोड कारागृहात जाण्याची शक्यता आहे.

आर्यनसाठी चिंतेची बाब

येत्या ४ नोव्हेंबरपासून दिवाळी असल्याने नोव्हेंबरच्या पहिल्याच आठवड्यात न्यायालयाच्या सुट्ट्या असतील. नोव्हेंबरच्या पहिल्या आठवड्याआधी जर आर्यनला जामीन मिळू शकला नाही तर आर्यनचा कारागृहातील मुक्काम वाढू शकेल. ड्रग्ज प्रकरणात आर्यनसह इतर सात आरोपी गेल्या दोन आठवड्यापासून आर्थर रोड तुरुंगात आहेत. २ ऑक्टोबर रोजी ताब्यात घेतल्यानंतर त्यांना ३ ऑक्टोबर रोजी अटक करण्यात आली होती.

विशेष न्या. व्ही व्ही पाटील यांनी आर्यनच्या जामीन अर्जावर निकाल जाहीर केला. आर्यनसह अरबाज मर्चंट आणि मुनमुन धमेचा यांनीही जामिनासाठी अर्ज केला होता. न्या. पाटील यांनी एनसीबीचा युक्तिवाद ग्राह्य धरून जामीन नामंजूर केला. आर्यन प्रभावशाली कुटुंबातील आहे आणि त्याला जामीन मंजूर झाला तर तपासात बाधा येऊ शकते, असा युक्तिवाद अतिरिक्त सॉलिसिटर जनरल अनिल सिंह यांनी केला होता. तसेच आर्यनकडे काही सापडले नसले तरी त्याला अमलीपदार्थ घ्यायचे होते आणि तो आंतरराष्ट्रीय तस्करांच्या संपर्कात होता असे गंभीर आरोप केले आहेत.