Sanjay Raut Vs ED : राऊतांच्या जामिनाविरोधात ईडीची हायकोर्टात धाव; तातडीच्या सुनावणीसाठी प्रयत्न

मुंबई : शिवसेना नेते संजय राऊत यांच्या जामिनाविरोधात ईडीनं हायकोर्टात धाव घेतली आहे. हायकोर्टाच्या कामकाजाची वेळ संपल्यानं आता ईडीकडून तातडीच्या सुनावणीसाठी न्यायमूर्तींना विशेष विनंती केली जात आहे. यासाठी दोन्हीकडचे वकील हायकोर्टात न्यायमूर्तींच्या चेंबरबाहेर उपस्थित आहेत.

या निकालाला आव्हान देण्यासाठी ईडीचे वकील अॅड. अनिल सिंग हे मुंबई हायकोर्टात पोहोचले आहेत. न्या. भारती डोंगरे यांच्यासमोर ही सुनावणी होणार आहे. पण ईडीला पोहोचेपर्यंत हायकोर्टाचं दैनंदिन कामकाज संपलं, त्यामुळं न्या. डोंगरे या आपल्या जागेवरुन उठल्या. मात्र अद्यापही त्या आपल्या चेंबरमध्ये आहेत. त्यामुळं ईडी शेवटचा प्रयत्न म्हणून त्यांच्या दालनात जाऊन या प्रकरणात तातडीच्या सुनावणीची गरज आहे, हे पटवून देण्याचा प्रयत्न करणार आहेत.

दुसरीकडे संजय राऊत आणि प्रविण राऊत यांचे वकील देखील हायकोर्टात उपस्थित असून मिळालेला जामीन कसा योग्य आहे आणि कायदेशीरदृष्ट्या त्यांची बाजू कशी योग्य आहे. तसेच आम्हालाही आमची बाजू मांडण्याची संधी दिली जावी, अशी मागणी ते करणार आहेत.

त्यामुळं हायकोर्ट यावर काय निर्णय घेतंय यावरुन संजय राऊत यांची आजच सुटका होईल की त्यांना तुरुंगात रहावं लागेल हे स्पष्ट होणार आहे. पण हायकोर्टानं जर या निर्णयाला तात्पुरती स्थगिती दिली आणि उद्या सकाळी पहिली केस सुनावणीसाठी ठेवली तर राऊतांना कदाचित रात्रभर तुरुंगातच रहावं लागेल. पण याची शक्यता कमी असल्याचं सांगितलं जातंय कारण हायकोर्टाच्या प्रक्रियेला वेळ लागू शकतो.