फेक टीआरपी प्रकरण: 'फक्त मराठी' चॅनलच्या मालकाला जामीन मंजूर

मुंबई, ता. 29 : फेक टीआरपी प्रकरणात मुंबई पोलिसांनी अटक केलेल्या फक्त मराठी या चॅनलचे मालक शिरीष पतनशेट्टी यांना आज सत्र न्यायालयाने पन्नास हजार रुपयांचा सशर्त जामीन मंजूर केला. टीआरपी वाढविण्यासाठी बेकायदेशीरपणे पैसे दिले असा गुन्हा पोलिसांनी दाखल केला आहे. पतनशेट्टी यांनी एड. अनिकेत निकम यांच्यामार्फत जामीनासाठी अर्ज केला होता. गुरुवारी यावर अतिरिक्त सत्र न्या. पी आर सित्रे यांच्यापुढे सुनावणी झाली. फक्त मराठी या चॅनलचा टीआरपी कधीही आकस्मिक पद्धतीने वाढलेला नाही आणि चॅनलच्या उत्पन्नातदेखील वाढ झालेली नाही, असा युक्तिवाद निकम यांनी केला.

पोलिसांनी केलेले आरोप हे तथ्यहीन आहेत आणि फक्त मराठी चॅनलने टीआरपी वाढवण्याकरता पैसे दिले यासंदर्भातला ठोस पुरावादेखील पोलिसांनी दाखल केला नाही, असा दावा त्यांनी केला. तसेच केवळ फक्त मराठी या एकाच चॅनलला यामध्ये गोवले आहे, असाही युक्तिवाद केला.

महत्त्वाची बातमी : रहिवाशांना दिलासा, उपकरप्राप्त इमारतींचा पुनर्विकास करताना 1 वर्षाचे भाडे आगाऊ जमा करण्यासाठी एस्क्रो खातं उघडणे बंधनकारक

युक्तिवाद पूर्ण झाल्यानंतर न्यायालयाने पतनशेट्टी यांना जामीन मंजूर केला. तसेच जामीन रकमेएवढाच अन्य एक हमीदार दाखल करणे, तपासाला सहकार्य करणे, साक्षी पुरावे प्रभावित न करणे अशा अटी न्यायालयाने घातल्या आहेत.

विशिष्ट घरांमध्ये पैसे देऊन बोगसपणे टीआरपी वाढवून जाहिरातींंचा लाभ घेतला, असा गुन्हा पोलिसांनी नोंदविला आहे. बार्क या ब्रॉडकास्ट ऑडियन्स रिसर्च काउन्सिलने यासंबंधी तक्रार केली आहे. याबाबत अन्य काही चॅनलची चौकशी सुरू असून पोलिसांनी अकरा जणांना अटकही केली आहे.

( संपादन - सुमित बागुल )

fake trp case fakta marathi channel owner granted bail by court