...तर महापालिकेच्या दारात "जनाजा' 

file photo
file photo

ठाणे : मुंब्रा भागात काही समाजकंटकांमुळे डॉक्‍टर मृत्यूचे प्रमाणपत्र देत नाहीत. त्यामुळे मृतदेह घरात ठेवून कुटुंबीयांना प्रमाणपत्र मिळवण्यासाठी वणवण करावी लागत आहे. प्रशासनाने ही समस्या तातडीने न सोडवल्यास मृतदेह घेऊन महापालिका मुख्यालयाच्या दारात उभा राहीन, असा इशारा राष्ट्रवादी कॉंग्रेसचे नगरसेवक शानू पठाण यांनी स्थायी समितीच्या बैठकीत दिला.

ठाणे महापालिकेच्या स्थायी समितीची बैठक शुक्रवारी (ता. 17) नरेंद्र बल्लाळ सभागृहात झाली. या वेळी राष्ट्रवादी कॉंग्रेसचे शानू पठाण यांनी मुंब्रा भागातील काही डॉक्‍टर मृत्यूचे प्रमाणपत्र देण्यास टाळाटाळ करत असल्याचा मुद्दा मांडला. तेथील काही समाजकंटक माहिती अधिकार कायद्याचा गैरवापर करून डॉक्‍टरांना त्रास देत आहेत. त्यामुळे डॉक्‍टर नैसर्गिक मृत्यूचे प्रमाणपत्र देत नाहीत. परिणामी एखाद्या व्यक्तीचे निधन झाल्यास कुटुंबीयांना मृतदेह घरातच ठेवून प्रमाणपत्र मिळवण्यासाठी डॉक्‍टरांची शोधाशोध करावी लागते. त्यासाठी काही वेळा तर हजारो रुपये मोजावे लागतात, असे पठाण यांनी सांगितले.

ठाणे महापालिकेच्या अनास्थेमुळे ही वेळ आल्याचा आरोप मुंब्रा-कौसा भागातील नागरिक करत आहेत. या प्रकाराला आरोग्य खाते जबाबदार असल्याची तक्रार आहे. त्यामुळे ही समस्या न सोडवल्यास "जनाजा' घेऊन मुख्यालयाच्या प्रवेशद्वारावर येऊ. त्यानंतर होणाऱ्या परिणामांना प्रशासन जबाबदार असेल, असा इशाराही पठाण यांनी दिला. त्यानंतर स्थायी समितीचे सभापती राम रेपाळे यांनी ही समस्या तत्काळ निकाली काढण्याचे आदेश दिले. 

पुढील आठवड्यात बैठक 
ठाणे महापालिकेचे अतिरिक्त आयुक्त समीर उन्हाळे यांनी येत्या आठवड्यात आरोग्य अधिकारी डॉ. वाळवीकर आणि मुंब्रा-कौसा येथील डॉक्‍टरांची बैठक घेण्याचे आश्‍वासन दिले. या बैठकीनंतर डॉक्‍टरांना महापालिकेच्या वतीने मृत्यू प्रमाणपत्र देण्यासंदर्भात आदेश देण्यात येतील, असे त्यांनी सांगितले.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com