अंबरनाथमध्ये रासायनिक कारखान्यात आग 

अंबरनाथ : अंबरनाथ येथील मोरोली औद्योगिक वसाहतीतील "प्रेशिया' या रासायनिक कारखान्यात सोमवारी दुपारी लागलेल्या भीषण आगीत कारखाना भस्मसात झाला. या घटनेत तेथे काम करणारे चार कामगार जखमी झाले. त्यापैकी एकाची प्रकृती चिंताजनक आहे. जखमींवर स्थानिक रुग्णालयात उपचार सुरू आहेत. आगीचे कारण समजू शकलेले नाही. 

दुपारी 3च्या सुमारास ही आग लागली, तेव्हा कारखान्यात 13 कामगार होते. वाऱ्यामुळे आगीने काही मिनिटांतच कारखान्याला वेढा घातला. कारखान्यातील रसायने ठेवलेल्या पिंपांचे स्फोट झाल्याने ती आणखीनच भडकली. या स्फोटांचे आवाज दूरवर ऐकू येत होते. आगीची माहिती मिळताच घटनास्थळी आलेल्या अंबरनाथ नगरपालिका, एमआयडीसी, उल्हासनगर महापालिका, कल्याण महापालिकेच्या अग्निशमन दलाच्या जवानांनी आठ बंबांच्या साह्याने ती विझवण्याचे प्रयत्न सुरू केले. सायंकाळी 6च्या सुमारास आगीवर नियंत्रण मिळवण्यात त्यांना यश आले. दरम्यान, आगीची माहिती मिळाल्यानंतर तहसीलदार जयराज देशमुख, सहायक पोलिस आयुक्त सुनील पाटील, अंबरनाथ नगरपालिकेचे मुख्याधिकारी देविदास पवार, आनंदनगर औद्योगिक वसाहतीचे (आमा) अध्यक्ष उमेश तायडे आदींनी घटनास्थळी जाऊन पाहणी केली. 

या कारखान्यात सायक्‍लोपेंटालोन नावाचे रसायन बनवले जाते. आग लागल्यानंतर कारखान्यातील कामगारांना सुखरूप बाहेर काढण्यात आले. आगीचे कारण समजू शकलेले नाही. 
- सुनील पाटील, सहायक पोलिस आयुक्त 

रेल्वेसेवेवर परिणाम 
आगीमुळे उठलेल्या धूराचे लोळ दूरवरून दिसत होते. हा कारखाना लोहमार्गानजीक आहे. या पार्श्‍वभूमीवर खबरदारीचा उपाय म्हणून रेल्वे वाहतूक एक तास थांबवण्यात आली होती.