शिवसेनेला धक्का! माजी आमदार तृप्ती सावंत यांचा भाजपात प्रवेश

मुंबई : मुंबईत लवकरच पालिकेच्या निवडणुकांची रणधुमाळी सुरु होणार आहे. या निवडणुकांना एक वर्षाचा अवकाश असला तरीदेखील भाजपाकडून पालिकेवर सत्ता मिळवणार असल्याचं म्हटलं जात आहे. त्यामुळे शिवसेनेसमोर भाजपाचं मोठं आव्हान असल्याचं पाहायला मिळत आहे. यामध्येच आता शिवसेनेला मोठा धक्का बसला आहे. शिवसेनेचे दिवंगत नेते प्रकाश उर्फ बाळा सावंत यांच्या पत्नी माजी आमदार तृप्ती सावंत यांनी भाजपामध्ये प्रवेश केला आहे. 

विधानसभेतील विरोधी पक्षनेते देवेंद्र फडणवीस यांच्या शासकीय निवासस्थानी तृप्ती सावंत यांनी भाजपामध्ये प्रवेश केला आहे. यावेळी विधानपरिषदेतील विरोधी पक्षनेते प्रवीण दरेकर, मुंबई भाजपाचे अध्यक्ष मंगल प्रभात लोढा, नितेश राणे, अतुल भातखळकर आणि इतरही नेते यावेळी उपस्थित होते.

पालिका निवडणुकांना केवळ एक वर्षाचा कालावधी बाकी असतांना तृप्ती सावंत यांनी शिवसेनेची साथ सोडल्यामुळे राजकीय वर्तुळात चर्चा रंगली आहे. तसंच त्यांच्या या पक्ष बदलामुळे भाजपाला आगामी निवडणुकांमध्ये फायदा होईल की तोटा याकडे सगळ्यांचं लक्ष वेधलं आहे.

दरम्यान,  २०१५ मध्ये माजी मुख्यमंत्र्यांचा पराभव करणाऱ्या तृप्ती सावंत यांना २०१९ च्या निवडणुकांमध्ये शिवसेनेने तिकीट नाकारलं होतं. त्यांच्या ऐवजी मुंबई पालिकेचे तत्कालीन महापौर विश्वनाथ महाडेश्वर यांना तिकीट देण्यात आलं होतं. त्यामुळे नाराज झालेल्या तृप्ती सावंत यांनी बंडखोरी करत अपक्ष म्हणून निवडणूक लढवली होती. मात्र, त्यात त्यांचा पराभव झाला होता.