#Positive "ऑपरेशन मुस्कान'मुळे 10 हजार बालकांची घरवापसी 

मुंबई : रेल्वे पोलिसांच्या "ऑपरेशन मुस्कान' मोहिमेंतर्गत तीन वर्षांत 10 हजार 149 बालकांची घरवापसी करण्यात आली आहे. रेल्वेस्थानकांतील अनाथ आणि बेघर मुलांना स्वकियांकडे सोपवून त्यांच्या चेहऱ्यावर हास्य उमटवण्यासाठी रेल्वे पोलिसांनी "ऑपरेशन मुस्कान' मोहीम राबवली होती. त्याला चांगलेच यश आल्याने चिमुरड्यांना आधार मिळाला आहे. 

ब्रेकिंग बातमी ठाण्यात मेट्रो कारशेडचा सर्वे शेतकऱ्यांनी उधळला

कुणी कुटुंबातल्या जाचाला कंटाळून; तर कुणी मुंबईच्या रुपेरी आकर्षणापोटी लहान वयातच घरातून पळ काढतात. घर सोडलेली मुले कधी भिकाऱ्यांच्या टोळीच्या हाती लागतात. कधी व्यसनाधीन होतात. कधी बालकामगार म्हणून त्यांना राबवले जाते. कधी तर त्यांचे लैंगिक शोषणही होते.

मुंबईकरांची तहान भागवणार हे प्रकल्प वाचा संपुर्ण बातमी

रेल्वेस्थानकांतील भटक्‍या आणि अनाथ मुलांना ताब्यात घेऊन त्यांना त्यांच्या कुटुंबियांकडे पुन्हा पाठवण्यासाठी विशेष मोहीम राबवण्याचे निर्देश पोलिस महासंचालक सुबोध जयस्वाल यांनी रेल्वे पोलिसांना दिले. त्यानुसार रेल्वे पोलिस आयुक्तालयाकडून 1 डिसेंबर ते 31 डिसेंबर 2019 दरम्यान "ऑपरेशन मुस्कान' मोहीम राबवण्याचा निर्णय घेण्यात आला. मोहिमेंतर्गत मुंबईतील रेल्वेस्थानकांतून 643 अनाथ मुलांना ताब्यात घेण्यात आले. त्यापैकी 481 अल्पवयीन बालकांना त्यांच्या पालकांकडे सुखरूप सोपवण्यात आले. उर्वरित 162 मुलांना बालसुधारगृहात पाठवण्यात आले आहे. 
तीन वर्षांत मुंबई रेल्वे पोलिस हद्दीत अनाथ आणि बेघर अशी 10 हजार 355 बालके सापडली. त्यापैकी 10 हजार 149 बालकांना त्यांच्या पालकांकडे सोपवण्यात यश आले. 206 बालकांची रवानगी बालसुधारगृहात करण्यात आली, असे रेल्वे पोलिस आयुक्तालयाकडून स्पष्ट करण्यात आले. 

धक्कादायक - मुंबई उपनगराचे झाले गॅस चेंबर

देशभरातील अनेक राज्यांतून लहान मुलांचे अपहरण करून त्यांना मुंबईत आणले जाते. लहान मुलांना भीक मागण्यासाठी पाठवले जाते. त्यामुळे लहान मुलांना भीक देऊ नये. संशयास्पद बालके आढळल्यास त्याची माहिती त्वरित रेल्वे पोलिसांना द्यावी, असे आवाहन रेल्वे पोलिसांनी केले. 

संशयास्पद बालके दिसल्यास हेल्पलाईन क्रमांक ः 1512 
व्हॉट्‌सऍप क्रमांक ः 8425099991 आणि 9594899991.