आजपासून आयसीएसईची दहावीची लेखी परीक्षा

मुंबई : आयसीएसई केंद्रीय मंडळाच्या दहावीच्या दुसऱ्या सत्राच्या परीक्षेची सुरुवात सोमवार (ता. २५)पासून देशभरात होत आहे. याच मंडळाच्या बारावीची परीक्षा मंगळवारी (ता. २६) होत आहे. त्याचबरोबर केंद्रीय माध्यमिक शिक्षण मंडळाच्या म्हणजेच सीबीएसईच्या दहावी-बारावीची परीक्षाही २६ एप्रिलपासून होत आहेत.

दोन्ही मंडळांच्या परीक्षा ऑफलाईन पद्धतीने होत आहेत. त्यासाठी दोन्ही मंडळांकडून विद्यार्थ्यांना काही दिवस अगोदरच हॉल तिकीट उपलब्ध करून देण्यात आले आहे. परीक्षा केंद्राची माहितीही प्रत्येक शाळा आणि परीक्षा केंद्रावर व संकेतस्थळावर उपलब्ध करून देण्यात आली आहे. आयसीएसई परीक्षेला विद्यार्थ्यांना कोरोनाच्या लशीपासून सवलत देण्यात आली आहे. त्यासाठी मंडळाकडून देान दिवसांपूर्वी एक परिपत्रक जारी करून त्यासाठीची माहिती देण्यात आली होती.

दुसरीकडे सीबीएसईनेही आपल्या दहावी-बारावीच्या दुसऱ्या सत्राच्या परीक्षेत विद्यार्थ्यांच्या लिहिण्याचा सराव कमी झाल्याचे लक्षात घेऊन परीक्षा वस्तुनिष्ठ आणि बहुपर्यायी पद्धतीने घेण्याचे नियोजन केले आहे. विद्यार्थ्यांना ४० गुणांची प्रश्नपत्रिका सोडवण्यासाठी दोन तासांचा वेळ दिला गेला आहे.