'कोणी केलं असेल तर...', लाल महालातील लावणीवरून आव्हाड संतापले

पुण्यातील लाल महालात तमाशातील गाण्यांवर लहान मुलींचे नृत्य आयोजन केल्याचं समोर आलं. हा व्हिडीओ व्हायरल झाल्यानंतर लाल महालाची बदनाम केली जात असल्याच्या प्रतिक्रिया आल्या. ही बदनामी करणाऱ्यांवर पोलिसांनी तत्काळ गुन्हा दाखल करावा, अशी मागणी संभाजी ब्रिगेडचे विकास पासलकर यांनी केली आहे. त्यानंतर आता गृहनिर्माण मंत्री जितेंद्र आव्हाड यांनी संताप व्यक्त करत ट्वीट केलंय. (Jitendra Awhad News)

महापालिकेने उन्हाळ्याच्या सुटीत लाल महाल बंद ठेवला आहे. पुणे शहरात हजारो पर्यटक जिजाऊ व शिवरायांच्या चरणी नतमस्तक होण्यासाठी येतात. मात्र पालिका व तेथील सुरक्षा रक्षकांकडून लाल महाल बंद ठेवण्यात आलेला आहे. (Lal Mahal Lavani Controversy)

मात्र, रिल्स करण्याच्या नादात लावणीवर नाचगाणी सुरू असल्याचा आरोप पासलकर यांनी केला आहे.

या व्हिडिओसंदर्भात तीन दिवसापूर्वी पोलीस आयुक्त अमिताभ गुप्ता, पालिका आयुक्त विक्रम कुमार यांच्याकडे संभाजी ब्रिगेडच्यावतीने तक्रार करण्यात आलेली आहे.

या घटनेच्या पाठीमागे खूप मोठे षडयंत्र आहे. हे षडयंत्र रचणारे व त्यांना साथ देणारे कोण आहेत, याचा शोध घेतला पाहिजे. या घटनेचा शुक्रवारी (ता.२०) लाल महालात जाऊन निषेध करण्यात आला. यावेळी जिजाऊ व शिवरायांना पुष्पहार अर्पण करून निषेध नोंदवण्यात आल्याची माहिती संभाजी ब्रिगेडने दिली.

आता संभाजी ब्रिगेडनंतर जितेंद्र आव्हाड यांनीही संताप व्यक्त केलाय. त्यांनी ट्वीट करत पुन्हा या गोष्टी टाळण्याचं आवाहन केलंय.