कंगना पडली तोंडघशी; शिवसेनेला नाईलाजाने मतदान करावं लागल्याचं वक्तव्य खोटं

नवी दिल्ली - अभिनेता सुशांत सिंह राजपूत मृत्यू प्रकरणी तपास सुरु असतानाच कंगना रानौतने मुंबईबाबत केलेल्या वक्तव्याने मोठा वाद निर्माण झाला होता. त्यानंतर कंगनाने अनेकांवर आरोप केले. मुंबईत येण्याआधी पंगा घेतलेल्या कंगनाला धमक्याही दिल्या जात होत्या. त्या पार्श्वभूमीवर तिला वाय प्लस सुरक्षाही केंद्र सरकारकडून पुरवण्यात आली होती. दरम्यानच्या काळात तिने शिवसेनेवर आरोप करताना असं म्हटलं होतं की, मी शिवसेनेला मतदान केलं तरी ते माझ्यासोबत असं वागत आहेत. आता तिच्या वक्तव्यावरून ती ट्रोल होत असून तोंडघशी पडली आहे. कंगनाने हे वक्तव्य केलं पण ती ज्या विधानसभा मतदारसंघात आहे तिथं भाजपचे उमेदवार निवडून आले आहेत. त्यामुळेच आता कंगनाने शिवसेनेला मतदान केलंच कसं असा प्रश्न विचारला जात आहे. 

एका वृत्तवाहिनीला दिलेल्या मुलाखतीवेळी कंगनाने म्हटलं होतं की, मी भाजपची समर्थक आहे आणि मतदान करण्यासाठी भाजपचा पर्याय शोधताना मला शिवसेनेचं बटन दाबा असं सांगण्यात आलं. युतीमुळे मला निवडणुकीत नाईलाजाने शिवसेनेला मत द्यावं लागलं असाही दावा कंगनानं केला होता. मात्र हे वक्तव्य करून कंगना स्वत:च तोंडावर पडली आहे. 

हे वाचा - कंगनाची दोन कोटींची भरपाईची मागणी बोगस, महापालिकेने दाखल केलं प्रतिज्ञापत्र

कंगनाचे वक्तव्य खोटं असल्याचं मुंबई तकने सविस्तर मांडल्यानंतर तिच्याकडून पत्रकारांना धमकीही देण्यात आली. कंगनाचे नाव ज्या विधानसभा मतदार संघात आहे त्या उत्तर मध्य मुंबई मतदार संघातून 2009 ते 2019 या काळात तीन लोकसभा आणि तीन विधानसभा निवडणुका झाल्या. या शिवसेनेनं महायुतीतून लढवल्या होत्या. 2014 ला शिवसेना महायुतीमधून बाहेर पडली असल्यानं वांद्रे पश्चिम या विधानसभा मतदार संघात आणि मुंबई मध्य लोकसभा मतदार संघाच्या जागा भाजपकडे होत्या. त्यामुळे 2009 ते 2019 या काळात तिथल्या निवडणुकीत शिवसेनेचा उमेदवारचं नव्हता. असं असताना कंगनाने शिवसेनेला मतदान केलं हे नेमकं कशाच्या आधारावर वक्तव्य केलं असा प्रश्न पडला. त्यातही 2014 च्या निवडणुकीत शिवसेना आणि भाजपचे उमेदवार एकमेकांविरोधात लढत होते. अशा वेळी कंगनाला भाजप हा पर्याय होता मग तेव्हा तिला नाईलाजाने शिवसेनेला मतदान करण्याची वेळ येऊच कशी शकते. 

इतकंच काय कंगनाने खार इथल्या शाळेत शिवसेना नेत्याला मतदान केलं असं म्हणत खोट्या बातम्या देऊ नका असं उत्तर दिलं. पण कंगना 2012 नंतर खार पश्चिम इथल्या डीबी ऑर्किड ब्रिज इमारतीमध्ये राहण्यासाठी आली. ही इमारत बांधण्यासाठी 2008 मध्ये सुरुवात झाली होती आणि 2012 मध्ये फ्लॅट मालकांच्या ताब्यात दिले होते. याच इमारतीचा पत्ता कंगनाच्या मतदान ओळखपत्रावर आहे. इतकं सगळं खोटं उघडं पाडल्यानंतर कंगनाने पत्रकार कमलेश सुतार यांना धमकीही दिली आहे. तसंच कंगनाने तिची यासंदर्भातील ट्विटसुद्दा डिलिट केली आहेत.