Kolhapur riots : नागपूर SITचा 'तो' अहवाल खुला करा, मग कळेल दंगली...; आंबेडकरांची मागणी

मुंबई - नागपूरच्या एसआयटीने काही दिवसापूर्वी रिपोर्ट केला होता. काही ठिकाणी दंगल होणार असा रिपोर्ट आहे. तो लोकांसमोर आणला तर आणखी ठिकाणे पुढं येतील. त्या रिपोर्टच काय झालं तो रिपोर्ट पुढे आणा, तो रिपोर्ट पुढे आला तर लोकांना कळेल की दंगली कशा इंजिनिअर्ड आहेत, असे मत कोल्हापूर दंगलीच्या पार्श्वभूमीवर वंचित बहुजन आघाडीचे प्रकाश आंबेडकर यांनी व्यक्त केले.

राज्यात काही ठिकाणी दंगली होतायेत, काही संघटनांचा अजेंडा आहे, असे मतही प्रकाश आंबेडकर यांनी मांडलं. कोल्हापूरात हिंदूत्ववादी संघटनांनी पुकारलेला बंदला हिंसक वऴण लागले. 13 ठिकाणी दगडफेक झाली. या पार्श्वभूमीवर प्रकाश आंबेडकर बोलत होते.

यावेळी आंबेडकरांनी मुंबईत झालेल्या तरुणीच्या हत्येवरूनही चौकशीची मागणी केली. सावित्रिबाई फुले वसतीगृहात 18 वर्षांच्या मुलीवर झालेला अत्याचार आणि निघृण हत्या यासंदर्भात आंबेडकर यांनी आज नरिमन पोलिस ठाण्याच्या अधिकाऱ्यांची भेट घेतली. याप्रकरणाची संपूर्ण चौकशी करा, अशी त्यांनी मागणी केली. सरकार नेहमी असं करत की घटना घडल्यानंतर चौकशी सुरु करते, अगोदर उपायोजना का केली जात नाही, असा सवाल त्यांनी केला.