तुमच्या कुंडल्या हाती येणार नाहीत याची काळजी घ्या, अतुल भातखळकरांचा मुख्यमंत्र्यांना इशारा

मुंबईः राज्याच्या विधिमंडळाचे हिवाळी अधिवेशन मंगळवारी पार पडले. अधिवेशनाच्या शेवटच्या दिवशी मुख्यमंत्री उद्धव ठाकरे यांनी आपल्या भाषणात विरोधकांवर टीका केली. सरकारवर करण्यात आलेल्या आरोपांवर आणि प्रश्नांवर मुख्यमंत्र्यांनी उत्तरे दिली. यावेळी मुख्यमंत्र्यांनी विरोधकांसारखे विकृत राजकारण आम्ही करत नाही. मागच्या वर्षांत विरोधकांच्या कुंडल्या बघणारे आणि गेल्या वर्षभरात सरकार पाडण्याचा मुहूर्त पाहणारे आता पुस्तके आणि अहवाल वाचू लागले आहेत, असा टोला विरोधी पक्षनेते देवेंद्र फडणवीस यांना लगावला. मुख्यमंत्र्यांनी केलेल्या विधानावर भाजप नेते आणि आमदार अतुल भातखळकर यांनी प्रत्त्युत्तर दिलं आहे. 

भातखळकर यांनी ट्विट करुन मुख्यमंत्र्यांना सडेतोड उत्तर दिलं आहे. महा भकास आघाडी आणि त्यांच्या कर्त्याधर्त्यांची चार दिन की चांदनी आटोपण्याच्या मार्गावर आहे. त्यांचे भविष्य आणि भवितव्य अंधारात आहे, हे सांगण्यासाठी कुंडली बघण्याचीही गरज नाही.  अजानवाले हिरवे हिंदुत्व, दत्तात्रय गोत्र आणि ११० कोटींची वांगी किती काळ चालणार?

महा भकास आघाडी आणि त्यांच्या कर्त्याधर्त्यांची चार दिन की चांदनी आटोपण्याच्या मार्गावर आहे. त्यांचे भविष्य आणि भवितव्य अंधारात आहे, हे सांगण्यासाठी कुंडली बघण्याचीही गरज नाही.
अजानवाले हिरवे हिंदुत्व, दत्तात्रय गोत्र आणि ११० कोटींची वांगी किती काळ चालणार?

— Atul Bhatkhalkar (@BhatkhalkarA) December 16, 2020

यासोबतच भातखळकर यांनी आणखी एक ट्विट केलं आहे. तुमच्या कुंडल्या हाती येणार नाहीत याची काळजी घ्या... त्यांचे वाचन सुरू झाले तर पोटात मुरडा येईल, अतुल भातखळकर यांनी अशा शब्दात ट्विट करत मुख्यमंत्री ठाकरे यांच्या वक्तव्याचा समाचार घेतला आहे. 

तुमच्या कुंडल्या हाती येणार नाहीत याची काळजी घ्या... त्यांचे वाचन सुरू झाले तर पोटात मुरडा येईल...

— Atul Bhatkhalkar (@BhatkhalkarA) December 16, 2020

काय म्हणाले होते मुख्यमंत्री उद्धव ठाकरे 

विकृत राजकारण आम्ही करत नाही. या राजकारणाला महाराष्ट्रात थारा नाही. देशात आदर असलेल्या संस्थांना घरच्या नोकरांसारखे वापरले जात असेल आणि त्याचा वापर जर आमच्याविरोधात केला जात असेल, तर ते सहन करू शकत नाही. कोणीही उठावे आणि टपली मारून जावे हे आता होणार नाही. हे सरकार विनासंकट चालेल.

 maharashtra assembly BJP Atul Bhatkhalkar warning CM Uddhav Thackeray