सरकारचं एक पाऊल मागे, सचिन वाझे यांच्याबाबत गृहमंत्र्यांची विधानपरिषदेत 'मोठी' घोषणा

मुंबई : मनसुख हिरेन मृत्यू प्रकरण सध्या राज्याच्या अर्थसंकल्पीय अधिवेशनात चांगलंच गाजतंय. आज अधिवेशनाचा शेवटचा दिवस आहे. अशात आजही विरोधकांकडून मनसुख हिरेन मृत्यू प्रकरणावरून सरकारला चांगलंच घेरण्याचा प्रयत्न केला गेला. विरोधकांचा आक्रमक पवित्रा पाहून महाराष्ट्राचे गृहमंत्री अनिल देशमुख यांनी सचिन वाझे यांची बदली केली जाईल असं  विधानपरिषदेत घोषित केलं.

गृहमंत्री अनिल देशमुख गृयांनी महाराष्ट्राचे मुख्यमंत्री उद्धव ठाकरे, उपमुख्यमंत्री अजित पवार आणि राष्ट्रवादी काँग्रेस पक्षाचे सर्वेसर्वा शरद पवार यांच्याशी चर्चा करून हा निर्णय घेतल्याचेही समजते आहे. 

महत्त्वाची बातमी : पाण्याखालून होणार घातक 'वार', सायलंट किलर 'INS करंज' नौदलात दाखल
 
विधानपरिषदेत काय म्हणालेत अनिल देशमुख  

"या प्रकरणात जो कुणी दोषी असेल, मग ते सचिन वाझे असो किंवा अजून कुणीही असो, महाराष्ट्र सरकार कुणालाही पाठीशी घालणार नाही. जो दोषी आहे त्यावर महाराष्ट्र शासन कारवाई केल्याशिवाय राहणार नाही. विरोधकांकडून सातत्याने सचिन वाझे यांच्यावर कारवाई करण्याची मागणी होतेय. मी त्यांना सांगतोय की याबाबत आता चौकशी सुरु करण्यात आलेली आहे. सचिन वाझे सध्या ज्या ठिकाणी सध्या क्राईम ब्रांचमध्ये काम करत आहेत, त्यांना त्या ठिकाणावरून बाजूला काढण्याची मागणी कालपासून केली जातेय. त्याप्रमाणे सचिन वाझे यांना सध्या क्राईम ब्रांचमधून काढून दुसरीकडे हलवण्यात येणार आहे" 

वाझेंच्या अटकेची मागणी

दरम्यान विरोधकांकडून आता वाझेंच्या अटकेची मागणी केली जातेय. वाझे यांचे तात्काळ निलंबन व्हावं अशीही मागणी दोन्ही सभागृहात विरोधकांकडून केली जात आहे. 

maharashtra government on back foot anil deshmukh announces transfer of sachin vaaze