कोरोनाच्या बरोबरीने आता 'म्युकॉर्मीकॉसिस'चा आजाराचा धोका

मुंबई: कोरोना व्हायरसच्या (corona virus) बरोबरीने आता म्युकॉर्मीकॉसिस (Mucormycosis)आजाराचा धोका निर्माण झाला आहे. महाराष्ट्राच्या काही भागात उदहारणार्थ उत्तर महाराष्ट्र, विदर्भात म्युकॉर्मीकॉसिसचा आजार झालेल्या रुग्णांच्या संख्येत वाढ झालीय. म्युकॉर्मीकॉसिसच्या आजारामध्ये मृत्यूदर ५० टक्क्यांपेक्षा जास्त आहे. म्युकॉर्मीकॉसिसला सध्या सुरु असलेल्या कोरोना साथीच्या आजाराचाच एक भाग समजले जाते. म्युकॉर्मीकॉसिसवर अँटी फंगल औषधे चालतात. या औषधांची आता कमतरता निर्माण झालीय, त्यावरुन आजाराची तीव्रता लक्षात येते. (Maharashtra Mucormycosis a death sentence once it reaches brain)

कोरोनाच्या पहिल्या लाटेनंतर म्युकॉर्मीकॉसिसची लागण झालेल्या रुग्णांच्या संख्येत वाढ झाली, त्यामुळे परेलच्या ग्लोबल हॉस्पिटलमध्ये म्युकॉर्मीकॉसिससाठी विशेष दवाखाना सुरु करण्यात आलाय. सध्या ग्लोबलमध्ये म्युकॉर्मीकॉसिस झालेले १८ रुग्ण दाखल आहेत. डोळे, नाक आणि घसा तज्ज्ञ डॉ. मिलिंद नवलखे यांच्या मार्गदर्शनाखाली म्युकॉर्मीकॉसिसच्या रुग्णांवर उपचार सुरु आहेत. ३१ रुग्णांना दाखल करण्यात आले, त्यातले २५ रुग्ण शहराबाहेरचे होते.

म्युकॉर्मीकॉसिसच्या रुग्णसंख्येमध्ये मोठी वाढ झाली आहे. सरकारने यामध्ये लक्ष घालण्याची गरज आहे, असे डॉ. नवलखे यांनी सांगितले. म्युकॉर्मीकॉसिसमध्ये अंधत्व येण्याची शक्यता असते. उपचार सुरु असलेल्या ग्लोबल रुग्णालयात सहा रुग्णांनी आपला वरचा जबडा गमावला असून एका रुग्णाला डोळ्याच्या बुबुळाला मुकावे लागले. परेलच्याच केईएम रुग्णालयात म्युकॉर्मीकॉसिसच्या २५ रुग्णांवर उपचार सुरु आहेत.

केईएममध्ये उपचार घेणारे बहुतांश रुग्ण दूरच्या जिल्ह्यातून आले असून आजार वाढल्यानंतर ते उपचारांसाठी दाखल झाले आहेत, असे केईएमच्या नाक, डोळ, घसा तज्ज्ञ विभागाच्या डॉ. हेतल मारफातिया यांनी सांगितले. या आजारात नाकापासून इन्फेक्शन सुरु झाल्यानंतर ते वरचा जबडा आणि नंतर मेंदूपर्यंत पोहोचते. म्युकॉर्मीकॉसिस मेंदूपर्यंत पोहोचला, तर मृत्यू होण्याची शक्यता जास्त असते, असे डॉ. हेतल यांनी सांगितले.

वर्षाला या आजाराचे फार कमी रुग्ण यायचे. पण सध्या दिवसाला म्युकॉर्मीकॉसिसचे तीन ते चार रुग्ण येत आहेत. म्युकॉर्मीकॉसिसच्या आजारामध्ये ट्रीटमेंट करताना औषधांची कमतरता हेच एक आव्हान नाहीय, तर या आजाराचे उपचारही खूप महागडे असतात. उपचारांचा खर्च सर्वसामान्यांच्या अवाक्याबाहेरचा असतो. औषधांचे रोजचा खर्च ६० ते ८० हजार असतो आणि रुग्णाला तीन आठड्यांपर्यंत ही औषधे घ्यावी लागतात, असे डॉ. झांबाणे यांनी सांगितले. टाइम्स ऑफ इंडियाने हे वृत्त दिलेय. कोविडच्या साथी आधी म्युकॉर्मीकॉसिस आजाराचे रुग्ण दुर्मिळ होते. पण कोरोनाची साथ आल्यानंतर या आजाराच्या रुग्णांमध्ये वाढ व्हायला, तीन गोष्टी कारणीभूत आहेत. कोविड, डायबिटीस आणि रोग प्रतिकारक शक्ती कमी असलेल्यांवर स्टेरॉईडचा वापर.