Mansukh Hiren Case: मनसुख हिरेनला फोन करून घोडबंदरला बोलवणारा 'तावडे' सापडला?

मुंबई: मनसुख हिरेन संशयास्पद मृत्यू प्रकरणात महाराष्ट्र एटीएसने रविवारी सकाळी दोन आरोपींना अटक केली. मिळालेल्या माहितीनुसार, हिरेन यांच्या हत्या प्रकरणात सचिन वाझे हे मुख्य आरोपी असून हिरेन यांच्या हत्येच्या कटात आज नव्याने अटक केलेल्या दोन आरोपींचाही समावेश होता, असा दावा एटीएसने केला. मुंबई पोलीस दलातून निलंबित करण्यात आलेले पोलीस कॉन्स्टेबल विनायक शिंदे आणि सट्टेबाजारी करणारा बुकी नरेश धरे याला रविवारी महाराष्ट्र एटीएसने अटक केली. या दोघांची चौकशी केल्यानंतर मनसुख हिरेनला फोन करून घोडबंदरला बोलावणारा तावडे नावाचा पोलीस अधिकारी कोण याचा उलगडा झाल्याचे बोलले जात आहे.

ज्युलियो रिबेरोंचं नाव घेत शरद पवारांनी काढली परम बीर सिंग यांची 'विकेट'?

मनसुख हिरेन यांचा मृतदेह ज्या दिवशी सापडला त्याच्या आदल्या दिवशी हिरेनला तावडे नावाच्या व्यक्तीचा फोन आला होता. त्याचा शोध एटीएसला लागल्याचे सांगितलं जात आहे. मनसुख यांना फोन करून भेटायला बोलवणारी व्यक्ती ही दुसरी तिसरी कुणी नसून विनायक शिंदे हाच होता असं तपासात समोर आल्याचं बोललं जात आहे. एटीएसने या प्रकरणाचा उलगडा झाल्याचं स्पष्ट केल्यानंतर आता या चर्चांना उधाण आले आहे. विनायक शिंदेने ४ फेब्रुवारीला मनसुख हिरेनला फोनवरून कांदिवली क्राइम ब्रँचमधून तावडे या नावाने फोन करून घोडबंदर येथं बोलावलं आणि त्यानंतर दुसऱ्याच दिवशी मनसुख हिरेन यांचा मृतदेह मुंब्रा रेतीबंदर खाडीत सापडला, असा निष्कर्ष एटीएसने तपासाअंती काढला असल्याची माहिती आहे.

"महाराष्ट्र वसूली आघाडी' राज्याचा कारभार चालवतंय"

तसेच, दुसरा आरोपी नरेश धरे हा बुकी असून त्याने या हत्या प्रकरणात आरोपींना ओळख लपवण्यासाठी मदत केल्याचे तपासात समोर आलं असल्याचीही माहिती आहे. धरेने गुजरातचे सीम कार्ड या गुन्ह्यात वापरण्यासाठी आरोपींना मदत केल्याचं तपासात समोर आलं आहे. याच सिमकार्डवरून विनायकने मनसुखला फोन केले होते. या गुन्ह्यात इतर आरोपींचाही सहभाग असून लवकरच त्यांच्यावर अटकेची कारवाई होणार आहे, अशीही माहिती आहे. त्याचसोबत, या प्रकरणात अटकेची कारवाई झाली असली तरीही हिरेन यांची हत्या का करण्यात आली? याचा शोध एटीएस घेत आहे.