अंबरनाथच्या पाणीपुरवठ्यात सुधारणा करा; पाणी पुरवठा मंत्र्यांचे आदेश 

अंबरनाथ  : अंबरनाथ शहरातील पाणी पुरवठ्यात सुधारणा करून पाण्याची गळती रोखून नागरिकांना सुरळीत पाणी पुरवण्याचे आदेश पाणीपुरवठा मंत्री गुलाबराव पाटील यांनी पाणी खात्याच्या अधिकाऱ्यांना दिले. 

अधिक वाचा : मुंबईसह पाच शहरात पाणीबाणी उद्धभवणार, जागतिक वन्यजीव निधीचा अहवाल

शहरातील वाढत्या पाणीटंचाईसंदर्भात आमदार डॉ. बालाजी किणीकर यांनी मागील आठवड्यात शिष्टमंडळासह पाणीपुरवठामंत्री पाटील यांची भेट घेत त्यांना बैठक घेऊन पाणीप्रश्‍न मार्गी लावण्याची मागणी केली होती. त्यावेळी पाटील यांनी बैठक घेऊन तोडगा काढण्याचे आश्‍वासन दिले होते.

त्यानुसार पाटील यांच्या दालनात बुधवारी (ता. 4) बैठक आयोजित करण्यात आली होती. याबैठकीत अंबरनाथ शहरातील पाणीटंचाई संदर्भात सविस्तर चर्चा करण्यात आली. पाणी समस्येवर ठोस उपाययोजना राबविण्यासंदर्भात उपस्थित अधिकाऱ्यांना निर्देश देण्यात आले. 

या बैठकीला शिवसेना विभागप्रमुख पद्माकर दिघे, सचिन गुडेकर, माजी नगरसेवक सुभाष साळुंखे, रवींद्र पाटील, ऍड. निखिल वाळेकर, चंद्रकांत भोईर, जीवन प्राधिकरणाचे मुख्य अभियंता सुभाष भुजबळ, अधीक्षक अभियंता मनीषा पालांडे, एमआयडीसी मुख्य अभियंता सुधाकर वाघ, जलसंपदा विभागाचे मुख्य अभियंता तिमनवार, उल्हासनगर प्रांताधिकारी जगतसिंग गिरासे, पाणीपुरवठा उपसचिव राजेंद्र गेंगणे, मुख्याधिकारी डॉ. प्रशांत रसाळ, एमआयडीसी कार्यकारी अभियंता राजाराम राठोड, मजीप्रा कार्यकारी अभियंता एस. के. दशोरे उपस्थित होते. 

क्लिक करा : बेस्टच्या सेवेत असलेल्या ST कर्मचाऱ्यांना दररोज भोजनभत्ता देणार, परिवहन मंत्र्यांची घोषणा

विविध मुद्द्यांवर चर्चा
अंबरनाथ शहरातील वाढती पाणी गळती थांबविणे, चिखलोली धरणाची उंची वाढविण्याचे काम जलदगतीने पूर्ण करण्यात यावे. चिखलोली धरणाचे काम पूर्ण होईपर्यंत बारवी धरणातून अंबरनाथकरिता अतिरिक्त पाणी येत्या आठवड्याभरात उपलब्ध करून देण्यात यावे, महाराष्ट्र जीवन प्राधिकरणाकडे एमआयडीसीच्या असलेल्या 86 कोटींच्या थकबाकीचे व्याज माफ करावे, चिखलोली धरणातून अंबरनाथ पूर्व भागातील वडवली विभाग, महालक्ष्मीनगर, शिवाजीनगर, कृष्णानगर आदी भागात होणाऱ्या दूषित पाणीपुरवठ्या संदर्भात धरणालगत असलेल्या व धरणात रासायनिक सांडपाणी सोडणाऱ्या कंपन्यांवर एमआयडीसी जलसंपदा आणि प्रदूषण नियंत्रण मंडळाच्या वतीने संयुक्त कारवाई करण्यात यावी, आदी विविध विषयांवर बैठकीत चर्चा करण्यात आली. 
---------------------------
(संपादन : प्रणीत पवार)