अन्यथा जनता रस्त्यावर उतरेल, मनसेचं सूचक टि्वट

मुंबई: कोरोनाचा प्रादुर्भाव रोखण्यासाठी राज्यात अनेक निर्बंध घालण्यात आले आहेत. त्यात आता सक्तीने दुकाने बंद ठेवली जात आहेत. त्यामुळे व्यापारी वर्गात संतापाची भावना आहे. काल मुंबईच्या अनेक भागात व्यापारी रस्त्यावर उतरले होते. त्यांनी सरकारच्या निर्णयाचा निषेध केला. मनसे अध्यक्ष राज ठाकरे यांनी सुद्धा काल घेतलेल्या पत्रकार परिषदेत व्यापाऱ्यांना दुकाने खुली ठेवण्याची परवानगी द्या, असे म्हटले होते. 

मुख्यमंत्री उद्धव ठाकरे यांनी स्वत: मनसे अध्यक्ष राज ठाकरेंना फोन करुन सहकार्य करण्याची विनंती केली होती. व्यापारी वर्गाची भावना लक्षात घेऊन, मनसेचे नेते संदीप देशपांडे यांनी सूचक टि्वट केले आहे. "अर्थ चक्र आणि निर्बंध याचा समतोल राखला गेला नाही तर जनता रस्त्यावर उतरेल हे आम्ही आधीच सांगितलं होतं. दंडुकेशहीच्या जोरावर लोकशाही चालू शकत नाही. अजूनही वेळ गेलेली नाही सरकारने सुधारणा करावी अन्यथा..... " असे टि्वटमध्ये म्हटले आहे. 

लॉकडाऊन का ?कशासाठी? हे प्रश्न चुकीचे आहेत - संजय राऊत
 

"मुंबईत कोरोनाचा वाढता प्रादुर्भाव आणि सरकारने त्या संदर्भात आखलेली नियमावली हे शब्दांचे खेळ करून एकाप्रकारे लाँकडाऊनच थोपवला आहे. सरकारने याबाबत विचार करायला हवा. व्यापाऱ्यांचे या पूर्वीच प्रचंड नुकसान झाले आहे.  हे असचं सुरू राहिलं तर जनता नक्की रस्त्यावर उतरेल. आज नागरिकांच्या भावनाही लक्षात घ्यायला हव्यात. त्यांनाही गरजेच्या वस्तू घेण्यासाठी दुकान आठवड्यातुन किमान काही दिवस उघडी ठेवण्यास परवानगी द्यावी" असे संदीप देशपांडे यांनी म्हटले आहे.