BEST Ho-Ho Bus : फक्त १५० रुपयांत फिरा अख्खी मुंबई

मुंबई : बृहन्मुंबई इलेक्ट्रिक सप्लाय अँड ट्रान्सपोर्ट (BEST) उपक्रमाने मुंबईत येणाऱ्या पर्यटकांसाठी विशेष वातानुकूलित बस सेवा सुरू केली आहे. विशेष म्हणजे, बेस्टने 8 ऑगस्टपासून नवीन हॉप ऑन-हॉप ऑफ वातानुकूलित बस सेवा सुरू करण्याची घोषणा केली होती.

या बसेसची दैनंदिन सेवा छत्रपती शिवाजी महाराज टर्मिनस (CSMT) येथून सुरू होते आणि तिकिटाची किंमत प्रति व्यक्ती 150 रुपये आहे. (Mumbai BEST Ho-Ho Bus)

हेही वाचा - Sextortion: भारत ही सेक्सटॉर्शनची जागतिक राजधानी होतेय का ?

हो-हो बसेसची वेळ काय आहे ?

बेस्टने दोन महिन्यापूर्वी रविवारी आपला ७५ वा वर्धापन दिन साजरा केला होता. यादरम्यान नवीन हॉप ऑन-हॉप ऑफ (हो-हो) वातानुकूलित बस सेवा म्युझियम, गेटवे ऑफ इंडिया, मरीन ड्राइव्ह, बाबुलनाथ, पेडर रोड, हाजी अली, रेसकोर्स, धोबी घाट (महालक्ष्मी स्टेशनजवळ) आणि राणीची बाग येथून धावणार असल्याचे सांगण्यात आले.

छत्रपती शिवाजी महाराज टर्मिनल येथून दर एक तासाने पर्यटकांसाठी सकाळी 9 ते रात्री 8 या वेळेत बसेस चालवण्यात येत आहेत. या बससाठी पर्यटक शुल्क रु. 150/- प्रति व्यक्ती निश्चित करण्यात आले आहे.

कोणत्याही ठिकाणी उतरून त्याच भाड्यात पुढे जाता येईल

सर्वसामान्यांना मुंबई दाखवण्यासाठी बेस्टने लंडनच्या धरतीवर 'हॉप ऑन-हॉप ऑफ' बससेवा सुरू केली होती. या बससेवेला चांगला प्रतिसाद मिळाल्यानंतर ती पुन्हा एकदा सुरू करण्यात आली आहे. बेस्टने रविवारी सुरू केलेल्या हो-हो बससेवेचे वैशिष्ट्य म्हणजे एखाद्या पर्यटकाला एखाद्या ठिकाणी उतरून आराम करायचा असेल किंवा वेळ घालवायचा असेल, तर त्याला त्याच भाड्यात दुसऱ्या ठिकाणी जाण्याची सोय असेल.