Mumbai : टायगर श्रॉफच्या सत्कारासाठी राहुल देशपांडेंची मैफिल थांबवली; भाजपाच्या कार्यक्रमातला प्रकार

मुंबईमध्ये भाजपाच्या वतीने आयोजित कार्यक्रमात गायक राहुल देशपांडे यांचा अपमान झाल्याचा आरोप शिवसेनेच्या ठाकरे गटाकडून करण्यात आला आहे. या कार्यक्रमातला एक व्हिडीओही शेअर करण्यात आला आहे. शिवसेनेच्या ठाकरे गटाचे नेते सचिन अहीर यांनी हा आरोप केला आहे.

मुंबईतल्या वरळीमध्ये मराठी सन्मानाचा आपला मराठमोठा दीपोत्सव हा कार्यक्रम आयोजित करण्यात आला होता. या कार्यक्रमामध्ये प्रसिद्ध गायक राहुल देशपांडे यांचा गाण्याचा कार्यक्रम आयोजित करण्यात आला होता. ही मैफिल सुरू असतानाच तिथे बॉलिवूड अभिनेता टायगर श्रॉफ आला. त्यामुळे ही मैफिल थांबवण्यात आली. त्यानंतर टायगर श्रॉफचा सत्कार स्टेजवर करण्यात आला. हा राहुल देशपांडे यांचा अपमान असल्याचं सचिन अहीर यांनी म्हटलं आहे.

नक्की झालं काय?

सचिन अहीर यांनी शेअर केलेल्या व्हिडीओमध्ये राहुल देशपांडे गात आहेत. याचवेळी सूत्रसंचालक पाच मिनिटांच्या ब्रेकची घोषणा करतात. त्यावर राहुल देशपांडे सांगतात की, आत्ता जर ब्रेक घेतला तर मी पुढे गाणं सादर करणार नाही. त्यानंतर आयोजकांसोबत चर्चा होते. आणि आपण २० मिनिटं गाणं सादर करतो, त्यानंतर तुम्हाला हवं ते तुम्ही करू शकता, असं राहुल देशपांडेंनी सांगितलं. पण असं होऊनही स्टेजवर टायगर श्रॉफचा सत्कार केला जातो. यावरुन सचिन अहीर यांनी ट्वीट करत आपला आक्षेप नोंदवला आहे. हाच का मराठी कलाकारांचा सन्मान? असा सवाल अहीर यांनी उपस्थित केला आहे.