Mumbai : इर्शाळवाडीतिल दुर्घटनेनंतर केडीएमसीला आली जाग; कल्याणतील कचोरे टेकडीवरील 15 कुटुंबाचे स्थलातरण

डोंबिवली - इर्शाळवाडीतील दुर्घटनेनंतर कल्याण परिसरातील नेतीवली व कचोरे टेकडीवरील 15 कुटुंबाचे स्थलांतर करण्याचा निर्णय केडीएमसी प्रशासनाने घेतला आहे. दरवर्षी पावसाळ्यात नेतीवली व कचोरे टेकडीवर घरांची पडझड होणे, भाग खचने यांसारख्या दुर्घटना घडत असतात.

टेकडीवरील जागा धोकादायक अवस्थेत असतानाही याठिकाणी झोपडपट्टी मध्ये मात्र दरवर्षी वाढ होत आहे. दुर्घटना घडून कोणतीही जीवित हानी होऊ नये याची उपरती यंदा पालिका प्रशासनाला झाली आहे.

कल्याण शहरातील नेतीवली आणि कचोरे टेकडीवर झोपडपट्टी ची संख्या दिवसेंदिवस वाढत आहे. टेकडी खोदून या बेकायदा झोपड्या उभ्या रहात आहेत. तसेच या टेकड्यावर दरवर्षी पावसाळ्यात दरड कोसळणे, घरांची पडझड, जमीन खचणे यांसारख्या घटना घडत असतात. या दुर्घटनांमध्ये अनेक नागरिक जखमी झाले आहेत तर, काही नागरिकांना आपला जीव देखील गमवावा लागला आहे.

यंदा इर्शाळ वाडी दरड दुर्घटनेनंतर कल्याण डोंबिवली प्रशासनाला जाग आली आहे. केडीएमसीने कचोरे टेकडीवरील 15 कुटुंबांना स्थलांतरित करण्याचा निर्णय घेतला आहे.

टेकडी वर असलेला मोठा दगड पडल्यास या दगडाखाली जवळपास 15 घरे चिरडण्याची भीती असल्याने प्रशासनाने हा दगड हटविण्यासाठी उपाययोजना करण्याचे निर्देश शहर अभियंत्याना दिले आहेत.

जोपर्यंत या दगडाचा प्रश्न निकाली निघत नाही तोपर्यंत या 15 कुटुंबाचे पालिकेच्या सभागृहात स्थलांतरित केली जाणार आहेत. पावसाळ्याच्या काळात किंवा धोकादायक दगड हटेपर्यंत ही कुटुंबे या सभागृहात राहणार असल्याचे अतिरिक्त आयुक्त मंगेश चितळे यांनी सांगितले आहे.