Mumbai Orange Alert : मुंबईला उदया पावसाचा ऑरेंज अलर्ट

मुंबई - पावसाने आज काहीशी उसंत घेत सरीने कोसळला. दिवसभऱ ढगाळ वातावरण होते. अचानक जोरदार सरीने पाऊस कोसळत राहिल्याने कार्यालय सुट़ल्यानंतर चाकरमान्यांनी तारांबळ झाली. हवामान विभागाने उदया पावसाचा ऑरेंज अलर्ट जाहिर केला आहे.

गेल्या चार दिवसांपासून मुंबईत पावसाचा जोर वाढला आहे. सलग तीन दिवस संततधार कोसळलेल्या पावसाने मुंबईची दाणादाण उडवून दिली. सखल भागात पाणी साचल्याने रस्ते वाहतुकीला फटका झाला. रेल्वे रुळावर पाणी साचल्याने रेल्वे ठप्प झाली.

गुरुवारीही मुसळधार पावसाचा इशारा हवामान विभागाने दिला होता. त्यामुळे शाळा, महाविद्यालयांना गुरुवारी सुट्टी जाहिर करण्यात आली. दुपारपर्यंत पाऊस जोरदार सरीने कोसळला. दुपारनंतर मात्र काहीशी उसंत घेत अधून मधून सरीने बरसला. हवामान विभागाच्या जोरदार पावसाच्या इशा-यामुळे काहींनी कार्यालय सुटल्यानंतर घर गाठण्यासाठी घाई केली. तर काहींनी अडकून पडायला नको म्हणून सुट्टी घेऊन घरीच राहणे पसंत केले. दरम्यान शुक्रवारीही जोरदार पावसाचा इशारा हवामान विभागाने दिला आहे.

पावसाची नोंद - (सायंकाळी ६ वाजेपर्यंत)

शहर - २१.५१ मिमी

पूर्व उपनगर - २३.८७

पश्चिम उपनगर - २१.८३

२५ ठिकाणी झाडे पडली

मुंबईत वा-यासह सरीने पडलेल्या पावसामुळे शहरात ९. पूर्व उपनगरांत ३, पश्चिम उपनगरांत १३ अशा एकूण २५ ठिकाणी झाडे व झाडांच्या फांद्या कोसळल्या. तर दोन ठिकाणी घरे पडल्याच्या घटना घडल्या.

घाटकोपर येथे डोंगरावरील माती घसरुन झाड कोसळले

घाटकोपर पश्चिम येथील खैरानी रोड, जंगलेश्वर मंदिर या ठिकाणी डोंगरावरील माती घसरुन रामजी नगर येथील झाड मंदिराच्या छतावर कोसळले. या घटनेनंतर सुरक्षेच्या दृष्टीने आजू बाजूच्या २५ ते ३० घरांमधील अंदाजे १०० लोकांना भटवाडी येथील बर्वेनगर पालिका शाळा क्रमांक १ या ठिकाणी स्थलांतरित करण्यात आले असल्याची माहिती पालिका प्रशासनाने दिली.