मुंबई : विधानपरिषदेसाठी भाजपचा कोणता 'सिंह' गर्जणार?

मुंबई : मुंबई महानगर पालिकेमधून विधानपरिषदेवर निवडून जाणाऱ्या दोन सदस्यांसाठी निवडणूक होणार आहे. ही निवडणूक डिसेंबर महिन्यात होणार असून यात भाजपच्या दोन उमेदवारांमध्ये चुरस सुरु झाली आहे. काँग्रेसमधून भाजपमध्ये आलेल्या राजहंस सिंह आणि कृपाशंकर सिंह हे दोघेही या निवडणुकीत उमेदवारी मिळावी यासाठी इच्छुक आहेत. (Mumbai-Legislative-Council-bjp-Candidate-krupashankar-singh -and-rajhansa-singh)

विधानपरिषदेच्या दोन जागांसाठी डिसेंबरमध्ये निवडणूक होणार आहे. या निवडणुकीसाठी नगरसेवक मतदान करतात आणि पहिल्या पसंतीची 77 मते मिळालेला उमेदवार निवडून येतो. भाजपकडे 83 नगरसेवकांचे बळ आहे. त्यामुळे यंदा भाजपच्या उमेदवाराचा विजय निश्‍चित मानला जात आहे. आगामी महानगर पालिका निवडणुका लक्षात घेऊन भाजपकडून उत्तर भारतीय चेहरा विधानपरिषदेसाठी पुढे केला जाण्याची शक्‍यता आहे. मुंबई महानगर पालिका निवडणुकीसाठी उत्तर भारतीयांची मतं महत्त्वाची आहेत. त्यामुळे काँग्रेसचे माजी आमदार, पालिकेतील विरोधी पक्षनेते राजहंस सिंह या निवडणुकीत उमेदवारी मिळण्यासाठी इच्छूक आहेत.

काँग्रेसचे माजी मुंबई अध्यक्ष कृपाशंकर सिंह यांनी काही दिवसांपूर्वी भाजपमध्ये प्रवेश केला. वास्तविक पाहता राज्यातील नेतृत्व त्यांना प्रवेश देण्यास तयार नव्हते. मात्र, कृपाशंकर सिंह यांनी थेट दिल्लीतून प्रयत्न केल्याने त्यांचा पक्षात प्रवेश झाला आहे. आता तेही विधानपरिषदेसाठी इच्छूक असल्याची माहिती समोर येत आहे. त्यांनी भाजपमध्ये प्रवेश केल्यापासूनच ही खुर्ची मिळवण्यासाठी प्रयत्न सुरु केले आहेत. त्यामुळे आता दोन्ही 'सिंह'या स्पर्धेत उतरले आहेत.

आता थेट दिल्लीवरुन निर्णय

राजहंस आणि कृपाशंकर सिंह हे दोघेही काँग्रेसमधून भाजपमध्ये आले आहेत. राजहंस सिंह यांचे भाजपच्या राज्यातील नेत्यांशी अत्यंत जवळचे संबंध आहेत. मात्र,आता कृपाशंकर सिंह यांच्यामुळे चुरस वाढली आहे. राज्य नेतृत्वाकडून या निवडणुकीसाठी काही इच्छूकांची नावे दिल्लीत पक्ष नेतृत्वाकडे पाठवली जातील. त्यातून एकाची अंतिम निवड दिल्लीतून होईल असे सांगण्यात आले.