Mumbai News : लोकल ट्रेन रुळावरून घसरली! कल्याण-कर्जत दिशेकडे जाणारी सेवा विस्कळीत

मुंबई : मध्य रेल्वेच्या अंबरनाथ स्थानकांदरम्यान डाऊन दिशेकडे जाणाऱ्या लोकलचा एक डबा रुळावरून घसरल्याची घटना समोर आली. लोकल रिकामी असल्याने कोणतीही जीवितहानी झाली नाही. मात्र, या घटनेमुळे कल्याण-कर्जत दिशेकडे जाणारी लोकल सेवा विस्कळीत झाली आहे. त्यामुळे प्रवाशांचे हाल झाले आहे.

मिळालेल्या माहितीनुसार, रविवारी सकाळी ८.२५ वाजता अंबरनाथ येथे रिकाम्या लोकलच्या एका डब्याचे एक चाक साइडिंगमध्ये रुळावरून घसरले. घटनेची माहिती संबंधित रेल्वे अधिकारी आणि कर्मचाऱ्यांना मिळताच, घटनास्थळी कर्मचाऱ्यांनी धाव घेतली. त्यानंतर लोकलचे चाक रुळावर आणण्याचे काम हाती घेण्यात आले आहे.

या घटनेमुळे कल्याण ते कर्जत दरम्यानच्या लोकल सेवेचे वेळापत्रक बिघडले आहे. तसेच डाऊन एलटीटी - विशाखापट्टणमला अंबरनाथ येथे थांबून ठेवले आहे. तसेच एक डाऊन बदलापूर आणि अंबरनाथ लोकलला उल्हासनगर येथे थांबविले आहे. त्यामुळे प्रवाशांची मोठी गैरसोय झाली आहे.