Mumbai News : गोरेगावमध्ये गॅस गळतीमुळे आग; आगीत होरपळून एकाचा मृत्यू

मुंबई : मुंबईच्या गोरेगाव पश्चिम परिसरात एलपीजी गॅस सिलिंडरचा स्फोट झाल्याची घटना सोमवारी सकाळी घडली आहे. जेवण बनवण्यासाठी गॅस स्टोव्ह सुरू केला असता एलपीजी गॅस सिलिंडरला गळती झाली. ज्यामुळे लागलेल्या आगीत एका व्यक्तीचा होरपळून मृत्यू झाला आहे.

हरीश चव्हाण या 55 वर्षीय व्यक्तीचा आगीत होरपळून मृत्यू झाला आहे. गोरेगाव पोलिसांनी मृत व्यक्तीचा मृतदेह शवविच्छेदनासाठी जवळच्या शासकीय रुग्णालयात पाठवला आहे. तसेच याप्रकरणी पुढील चौकशीला सुरुवात केली आहे

मिळालेल्या माहितीनुसार, गोरेगाव पश्चिमेकडील प्रेमनगर परिसरात हरीश चव्हाण आणि त्याचा एक साथीदार आज सोमवारी सकाळी कामावर निघण्यापूर्वी घरी जेवण बनवण्याची तयारी करत होते. यासाठी लाईटरने शेगडी पेटवण्याचा प्रयत्न केला असता आगीचा भडका उडाला. ही आग विझवण्याचा प्रयत्न करत असतानाच हरीश चव्हाण यांच्या अंगावरील कपड्यांनी पेट घेतला.

यात हरीश चव्हाण भाजून गंभीर जखमी झाले. त्याच्यासोबत असणाऱ्या व्यक्तीने हरीश यांना वाचवण्याचा प्रयत्नही केला मात्र भाजलेल्या जखमा जास्त असल्यामुळे हरीश यांचा रुग्णालयात नेण्यापूर्वीच मृत्यू झाला.