मुंबई : पोलिसांनी केले तीन कोटींचे अमली पदार्थ जप्त; तिघांना अटक

रोहिणी गोसावी : सकाळ वृत्तसेवा

मुंबई : सरत्या वर्षाच्या शेवटच्या दिवशी मुंबई पोलिसांच्या (Mumbai police) अंमली पदार्थ विरोधी पथकानं (Anti narcotic cell) मोठी कारवाई करत 3 कोटींचे अंमली पदार्थ जप्त (three crore drug seized) केले आहेत. या प्रकरणी तीन नायजेरियन नागरिकांना अटक (Three Nigerian culprit arrested) करण्यात आली आहे. मुंबईतल्या बांद्रा मधल्या टाटा वसाहत परिसरात ही कारवाई करण्यात आली आहे. हे अंमली पदार्थ 31 डिसेंबरच्या सेलिब्रेशनसाठी विकले जात होते. (Mumbai police arrested three Nigerian culprits in drugs crime and seized three crore drugs)

अंमली पदार्थ विरोधी पथकाच्या बांद्रा युनिटमधल्या पोलीस निरीक्षक संजय चव्हाण, सहाय्यक पोलीस निरीक्षक वाहीद पठाण, सहाय्यक पोलीस निरीक्षक सुरेश भोये यांची टिम बांद्रा कुर्ला संकुल रोडवर गस्त घालत असताना त्यांना एक नायजेरियन नागरिक संशयास्पदरित्या फिरताना दिसला. इबे चिनाडू माईक असं त्याचं नाव आहे. या टिमनं त्याला हटकलं तेव्हा त्यानं पळून जाण्याचा प्रयत्न केला. त्याला पकडून त़्याच्या बॅगेत काय आहे विचारलं तेव्हा त्यानं बॅगेत कोकेन आणि एमडी ड्रग असल्याचं सांगितलं.

त्याच्या बॅगेची झडती घेतली तेव्हा बॅगेत 105 ग्रॅम कोकेन आणि 120 ग्रॅम एमडी ड्रग टिमला सापडलं. ते कुठून आणलं हे विचारलं तेव्हा त़्यानं त्याच्या दोन साथीदारांची नावं आणि ठिकाणं सांगितली. त्यानंतर अंमली पदार्थ विरोधी पथकाच्या टीमनं वाशी टोल नाक्याजवळून दोघांना ताब्यात घेतलं, ओडीफे आणि मंडे अशी त्या दोघांची नावं आहेत. ओडीफेकडून 120 ग्रॅम कोकेन आणि 850 ग्रॅम एमडी ड्रग जप्त करण्यात आले आहे. तीघांकडूनही जप्त करण्यात आलेल्या अंमलीपदार्थांची किंमत आंतरराष्ट्रीय बाजारात जवळपास 3 कोटी रुपये इतकी आहे.

तिघंही नायजेरीयन नागरीक मुंबईतल्या उच्चभ्रु लोकांना अंमली पदार्थ विक्री करत असल्याची माहिती तिघांच्या प्राथमिक चौकशीतून समोर आली आहे. तिनही ड्रग पेडलर्सवर एनडीपीएस कायद्याच्या कलम 8(क), 21(क), 22(क), 29 अन्वये गुन्हा दाखल करण्यात आला आहे.