ऑनलाइन पेपरला कॉपी; मुंबई विद्यापीठ करतंय ऑफलाइन परीक्षेची तयारी

मुंबई - मुंबई विद्यापीठाच्या (Mumbai University) परीक्षा पुढच्या सेमिस्टरमध्ये ऑफलाइन कऱण्यात येणार आहे. ऑनलाइन परीक्षांमध्ये वाढत्या कॉपीच्या प्रकारामुळे हा निर्णय घेण्यात आला आहे. आता टप्प्याटप्प्याने ऑनलाइनन परीक्षांचा पर्याय थांबवणार आहे. मुंबई विद्यापीठाचे व्यावसायिक अभ्यासक्रम, इंजिनिअरिंग, लॉ, एमबीए यांच्या परीक्षा पुर्णपणे ऑफलाइन करण्यासाठी नियोजन केले जात असल्याची माहिती मिळत आहे.

ऑनलाइन परीक्षेमध्ये कॉपी होते हे प्रकरण गंभीर असून त्यामुळे विद्यापीठाने याची दखल घेतली आहे. ऑनलाइन परीक्षेत विद्यार्थ्यांकडून कॉपी करण्यासाठी विविध क्लृप्त्या वापरल्या जातात. ऑनलाइन परीक्षा थांबवून टप्प्याटप्प्याने ऑफलाइन परीक्षा घेण्यात येणार आहेत. पुढच्या सेमिस्टरला काही अभ्यासक्रमाचे पेपर ऑफलाइन होतील. तंत्रज्ञानातील त्रुटीचा फायदा घेत विद्यार्थ्यांकडून गैरफायदा घेतला जात असल्यानं विद्यापीठाने ऑफलाइन परीक्षेसाठी हालचाली सुरु केल्या आहेत.

कॉपी कशी व्हायची?

पेपर सुरु होताच काही मिनिटातंच त्याची उत्तरे व्हायरल व्हायची. विद्यार्थ्यांना ग्रुपवर प्रश्नपत्रिकेतील उत्तरे यायची. अशा प्रकारच्या कॉपी करण्याच्या प्रकाराला आळा घालणं ऑनलाइन पद्धतीमध्ये शक्य नसल्यानं विद्यापीठ आता ऑफलाइन परीक्षा घेण्याचा विचार करत आहे.