मुंबई : बॉम्बस्फोटाची धमकी देणाऱ्‍या तरुणाला पोलिस कोठडी

मुंबई ः मुंबई पोलिसांच्या मुख्य नियंत्रण कक्षाला कॉल करून बॉम्बस्फोटाची धमकी देणाऱ्‍या एका तरुणाला गुन्हे शाखेच्या अधिकाऱ्‍यांनी अटक केली. मुस्तफा साबीरअली शेख असे या ३० वर्षीय तरुणाचे नाव असून अटकेनंतर त्याला पुढील चौकशीसाठी आझाद मैदान पोलिसांकडे सोपविण्यात आले आहे. या गुन्ह्यांत तो मंगळवार, २८ सप्टेंबरपर्यंत पोलिस कोठडीत असल्याचे वरिष्ठ पोलिस निरीक्षक भूषण बेळणेकर यांनी सांगितले.

१६ सप्टेंबरला सकाळी साडेनऊ वाजता मुंबई पोलिसांच्या मुख्य नियंत्रण कक्षाला एका व्यक्तीने फोन करून मुंबई शहरात बॉम्बस्फोट होणार असल्याचे सांगितले. या वेळी सहावी गल्ली, सोमवारपाडा या परिसराचा उल्लेख केला होता. पोलिसांनी संबंधित परिसराची तपासणी केली होती. पोलिसांची दिशाभूल करणे तसेच दहशत निर्माण केल्याप्रकरणी अज्ञात व्यक्तीविरुद्ध आझाद मैदान पोलिसांनी गुन्हा नोंदविला होता. शुक्रवारी गुन्हे शाखेच्या गुन्हेगारी गुप्तवार्ता विभागाच्या अधिकाऱ्‍यांनी मुस्तफा शेख याला अटक केली. त्याच्या चौकशीत त्यानेच बॉम्बस्फोट होणार असल्याचा कॉल केल्याची कबुली दिली.