परमबीर सिंग रशियामध्ये आहेत का?

मुंबई: मुंबईचे माजी पोलीस आयुक्त परमबीर सिंग (Param Bir Singh) कुठे आहेत? या बद्दल राज्य सरकार आणि तपास यंत्रणांना कुठलीही कल्पना नाहीय, असे राज्याचे गृहमंत्री दिलीप वळसे पाटील (dilip walse patil) यांनी गुरुवारी सांगितले. परमबीर सिंग यांच्यावर आर्थिक अफरातफरीचे आरोप आहेत. परमबीर सिंग रशियाला (russia) पळून गेल्याची मीडियामध्ये चर्चा आहे. हिंदुस्थान टाइम्सने हे वृत्त दिले आहे.

अनेकदा नोटीसा बजावूनही परमबीर सिंग तपास यंत्रणांसमोर हजर झाले नाहीत. त्यामुळे त्यांच्याविरोधात लुकआऊट सर्क्युलर जारी करण्यात आल्याचे वळसे पाटील म्हणाले. सरकार त्यांचा शोध घेत आहे. "परमबीर सिंह हे एक सरकारी अधिकारी असल्यामुळे देशाबाहेर जायच्या आधी सरकारची परवानगी घेणे बंधनकारक आहे. गृहमंत्रालयाच्या मदतीने आम्ही त्यांचा शोध घेत आहोत" असे गृहमंत्र्यांनी यावेळी सांगितले.

"ते जर देशाबाहेर गेले असतील, तर ही बाब योग्य नाही. मंत्री किंवा अधिकारी कोणीही असेल तर त्यांना परवानगी घेतल्याशिवाय देशाबाहेर जाता येत नाही. त्यांचं इथे असणं गरजेचं आहे, त्यांनी जे प्रश्न उपस्थित केले होते, त्याचा हिशोब करायचा आहे, मात्र आम्ही कोणावरही जाणीवपूर्वक कुणाच्या मागे लागून कारवाई करणार नाही, हा सगळा रुटीन कारवाईचा भाग असल्याचं त्यांनी यावेळी सांगितलं"