राणेंच्या अडचणीत वाढ; जन आशीर्वाद यात्रेच्या आयोजकांवर गुन्हा!

मुंबई : कोविडच्या पार्श्वभूमीवर गर्दी जमवायला परवानगी नसताना भाजपनं काढलेल्या जन आशीर्वाद यात्रेला राज्य सरकारनं मोठी कारवाई केली आहे. केंद्रीय मंत्री नारायण राणे यांनी ही यात्रा काढली होती. ही यात्रा काढल्यानंतर पोलिसांनी सात विविध पोलीस ठाण्यांमध्ये भाजप पदाधिकाऱ्यांवर गुन्हे दाखल केले आहेत.

जन आशीर्वाद यात्रेची परवानगी नसतानाही ती काढल्यानं पोलिसांनी ही कारवाई केली आहे. कोरोना काळात नियमांचे उल्लंघन केल्याप्रकरणी सात पोलीस स्टेशनमध्ये FIR दाखल करण्यात आले आहेत. यामध्ये विलेपार्ले, खेरवाडी, माहिम, शिवाजी पार्क, दादर, चेम्बूर, गोवंडी या पोलीस ठाण्यांचा समावेश आहे.

नवी मुंबईतही जन आशीर्वाद यात्रेवर कारवाई

भाजपाच्या नवी मुंबईतील पदाधिकाऱ्यांनी केंद्रीय राज्यमंत्री कपिल पाटील यांच्या स्वागतासाठी मंगळवारी सायंकाळी महापालिका मुख्यालयापासून जनआशीर्वाद यात्रा काढली होती. या यात्रेत कोरोना नियमांचे उल्लंघन केल्याने एनआरआय पोलिसांनी आयोजकांसह ७० ते ८० भाजपच्या कार्यकर्त्यांवर गुन्हा दाखल केला आहे.