पापं झाकण्यासाठी शिवसेनेचे शक्ती प्रदर्शन; नारायण राणेंचा हल्लाबोल

मुंबई : शिवसेना खासदार संजय राऊत (Sanjay Raut ) ईडीच्या कारवाईनंतर आज दिल्लीहून मुंबईत दाखल झाले आहेत. त्यांच्या स्वगतासाठी लाखो शिवसेना कार्यकर्त्यांनी विमातळ परिसरात एकत्र येत राऊत यांचे ढोलताशांच्या गजरात जंगी स्वागत केले आहे. दरम्यान, कारवाईनंतर मुंबई विमानतळावर केेलेल्या शिवसेनेच्या या शक्ती प्रदर्शनावर केंद्रीय मंत्री नारायण राणे (Narayan Rane) यांनी ट्वीट करत टीका केली आहे. (Narayan Rane Tweet )

नारायण राणे यांनी केलेल्या ट्वीटमध्ये म्हंटले आहे की, कुठे नेऊन ठेवलाय महाराष्ट्र?? काळा पैसा मिळवायचाय, अन् कारवाई झाली की बोंबलायचं.. त्यानंतर केलेली पापं झाकण्यासाठी शक्ती प्रदर्शन करायचं. यातून जनतेने काय बोध घ्यावा? असे म्हणत संजय राऊत यांचं लक्ष पक्षप्रमुख पदावर की मुख्यमंत्री पदावर? असे म्हणत त्यांनी राऊत यांच्यावर थेट हल्लाबोल केला आहे.

भाजपनं महाराष्ट्रात स्वतःची कबर खोदून ठेवलीए - संजय राऊत

"हे शिवसेनेचं शक्तीप्रदर्शन नाही. ही लोकांच्या मनातील चीड आणि संताप आहे. आज आयएनएस विक्रांतप्रकरणी जो घोटाळा झाला आहे त्याविरोधात शिवसेना पक्षप्रमुखांच्या आदेशानं आज महाराष्ट्रातील गावपातळीवर शिवसेनेकडून आंदोलन करण्यात आलं. ज्या प्रकारे महाविकास आघाडीच्या नेत्यांवर केंद्रीय तपास यंत्रणांच्या खांद्यावर बंदुक ठेऊन शिवसेना आणि इतर नेत्यांवर हल्ले केले जात आहेत. ही सुरुवात असून आता ठिणगी पडलेली आहे. यापुढे जसजशी भाजपची पावलं पडतील तशी आमची पावलं पडतील. मी फक्त निमित्त आहे, महाराष्ट्रात माझ्यासारख्या असंख्या राजकीय कार्यकर्त्यांवर नेत्यांवर तसेच भाजपच्या राजकीय विरोधकांवर कारवाया सुरु आहेत. पवार साहेबांनी याबाबतची तक्रार पंतप्रधानांकडं मांडली आहे"