सोसाट्याच्या वाऱ्याने झाड छप्पर तोडून पडलं १२ दिवसांच्या बाळाच्या पाळण्यावर, बाळही होतं त्यात पण...

खालापूर : निसर्ग चक्रीवादळ धडकणार म्हणून सर्वत्र सतर्कता घेतली जात होती. अनेक ठिकाणी वाऱ्याच्या प्रवाहामुळे झाडे उन्मळून पडली आहेत. मात्र, खालापुरात अवघ्या 12 दिवसांच्या बाळाने निसर्गला चकवा दिल्याने वादळी वाऱ्याने पाळण्याजवळ पडलेल्या झाडापासून बचावले आहे. 

ही बातमी वाचली का?  चक्रम वादळापासून सावध राहा, शिवसेनेनं राज्यपालांना दिला सल्ला

बुधवार सकाळपासूनच सुरू झालेल्या निसर्गच्या वादळी वाऱ्यामुळे अनेकांची त्रेधा तिरपीट उडाली होती. अनेक ठिकाणी झाडे कोसळण्याच्या घटना घडत होत्या. त्यातच खालापुरातील नावंढे आदिवासी वाडीतील संतोष लक्ष्मण पवार यांचे घरही या वादळातून सुटले नाही. संतोष यांच्या घराशेजारी असलेले ताडाचे झाड घरावर कोसळले. त्यावेळी त्यांचा नातू पाळण्यात झोपला होता. झाडांच्या फांद्या पाळण्यावर पडल्याने पाळणा तुटला; पण सुदैवाने पाळण्यातील 12 दिवसांचे बाळ सुखरूप राहिले. पाळणा तुटूनही त्या इवल्याशा काहीही झाले नाही. घटनेची माहिती मिळताच खालापूर तहसीलदार इरेश चप्पलवार, पंचायत समितीचे सदस्य अक्षय पिंगळे, खालापूर नगर पंचायत उपनगराध्यक्षा शिवानी जंगम, नगरसेवक संतोष जंगम यांनी भेट देत पवार कुटुंबाला स्थलांतरित केले. 

ही बातमी वाचली का? आपल्या पाठिशी मुंबा देवीची कृपा आणि विठू माऊलीचे आशिर्वाद आहेत

वादळामुळे अनेक भागांत नुकसान
निसर्ग चक्रीवादळ धडकणार असल्याने जिल्हा प्रशासनाने सर्वत्र सतर्कतेचे आदेश दिले होते. दुपारी 1 नंतर खालापुरात वाढलेला वाऱ्याचा वेग आणि जोरदार पावसात साबाईनगर, महड मंदिराकडे जाण्याच्या मार्गावर मोठी झाडे कोसळली. खडक आळी भागात चव्हाण यांच्या घराचे पत्रे उडाले. सावरोली-खालापूर रस्त्यावर विद्युत खांब कोसळल्याने वाहतूक बंद करण्यात आली. तर चौक फाटा येथील मोठी होर्डिंग मुंबई-पुणे जुन्या महामार्गावर कोसळल्याने काही दुचाकींचे नुकसान झाले आहे. 

ही बातमी वाचली का?  यंदाच्या पावसाळ्यातील 'हे' २४ दिवस आहेत धोक्याचे...

निसर्गमुळे अनेक घरांचे पत्रे उडाले आहेत. झाडे आणि विद्युत खांब कोसळले आहेत. सुदैवाने कुठेही जीवितहानी झालेली नाही. खोपोलीतील 1200 जणांना स्थलांतरित केले असून त्यांची पूर्ण व्यवस्था केली आहे.
- इरेश चप्पलवार, तहसीलदार, खालापूर.

खालापुरात धोकादायक घरातील 400 जणांना सुरक्षितस्थळी हलवले आहे. जेवणाची व्यवस्था केली आहे.
- शिवानी जंगम, उपनगराध्यक्षा, खालापूर, नगर पंचायत.