सरकारचा अहवाल वाचलेला नाहीये, विलीनीकरणावर अद्याप निर्णय नाही: परब

मुंबई: एसटी संपावर आज हायकोर्टामध्ये सुनावणी पार पडली आहे. मात्र, कोणताही निर्णय या सुनावणीमध्ये झालेला नाहीये. आता याबाबत पुढील शुक्रवारी सुनावणी होणार आहे. या सुनावणीनंतर परिवहन मंत्री अनिल परब यांनी आता भाष्य केलंय. त्यांनी म्हटलंय की, मी अहवाल अजून पाहिला नाहीये. अहवाल माझ्याकडे आलेला नाहीये.

त्यांनी म्हटलंय की, विलीनीकरणाबाबत सरकारने अद्याप काही निर्णय घेतलेला नाहीये. सरकारने अहवाल कोर्टात सादर केला आहे. कामगारांचा एक मुद्दा सोडला तर बाकी सर्व मागण्या आपण पूर्ण केल्या आहेत. सरकारी वकिलांनी कोर्टात माहिती दिली आहे. राज्य सरकारने दिलेला अहवाल वाचलेला नाहीये. मात्र, तो कामगारांच्या वकिलांकडेही गेलेला आहे. तो पूर्ण वाचूनच मी त्यावर प्रतिक्रिया देईन.

मी कामगारांना दररोज आवाहान करतोय. आपण कामावर या, तुमचे सगळे हक्क तुम्हाला मिळतील मात्र, एसटी बंद करुण बसण्यात अर्थ नाही. कोट्यवधी लोकांचं नुकसान होतंय. विद्यार्थ्यांचं नुकसान होतंय. ग्रामीण भागातील लोकांनाही फटका बसतोय. म्हणून माझं आवाहन आहे की, कामावर या आणि आपण चर्चा करु. लोकांच्या सेवेसाठी एसटी सुरु झाली पाहिजे, असं मी पुन्हा आवाहन करतो, असं त्यांनी म्हटलंय.