‘समाजाच्या शाश्वत विकासासाठी शासन, संत आणि समाजाने एकत्र आले पाहिजे. त्याला सज्जनशक्तीच्या पाठबळाची आवश्यकता आहे. राज्यातील देवस्थानांमध्ये इच्छापेटी, सेवापेटी आणि दानपेटी ठेवली जाणार आहे. यातून आलेल्या अपेक्षा ‘सकाळ माध्यम समूहा’च्या वतीने एकत्रित केल्या जाणार आहेत. त्यातून समाजाच्या अपेक्षा आणि समस्या लक्षात येतील.
समाजाच्या सर्वांगीण विकासासाठी संबंधित यंत्रणांना त्याची माहिती देऊन पाठपुरावा केला जाईल. त्याच्या प्रत्यक्ष अंमलबजावणीसाठीच ‘सकाळ माध्यम समूहा’च्या वतीने भक्ती-शक्ती व्यासपीठाची स्थापना करण्यात आली आहे,’ अशी घोषणा ‘सकाळ माध्यम समूहा’चे व्यवस्थापकीय संचालक व ‘एपी ग्लोबाले’चे अध्यक्ष अभिजित पवार यांनी केली.
वरळीच्या ‘एनएससीआय डोम’ येथे सुरू असलेल्या पादुका दर्शन सोहळ्यात पवार यांनी केलेल्या प्रास्ताविकात भक्ती-शक्ती व्यासपीठाबाबतची भूमिका स्पष्ट केली. मुख्यमंत्री देवेंद्र फडणवीस आणि ‘जीवन विद्या मिशन’चे प्रल्हाददादा पै यांचा संदर्भ घेत पवार म्हणाले, की आज व्यासपीठावर भक्ती आणि शक्ती एकत्र आली आहे.
मुख्यमंत्री फडणवीस हे शक्तीचे, तर पै हे भक्तीचे रूप आहे. शक्तीविना भक्ती निष्क्रिय असून, भक्तीविना शक्ती विनाशक आहे. भक्ती आणि शक्ती एकत्र आणण्यासाठी आज आपण येथे एकत्रित आलो आहोत. शासन, संत आणि समाज एकत्रित आल्यावर समाजासाठी ताकद निर्माण होऊ शकते. त्यासाठी आजचा सोहळा दिशादर्शक आहे.
पवार म्हणाले, की शक्ती आणि भक्ती ही सात्त्विक, राजसिक आणि तामसिक असते. राजसिक आणि तामसिकमध्ये केवळ स्वतःपुरता विचार होतो; परंतु सात्त्विकमध्ये समाजाचा विचार होतो. सात्त्विकतेमध्ये निःस्वार्थ भाव असतो. हा भाव भक्ती-शक्ती व्यासपीठाच्या माध्यमातून जागृत केला जाणार आहे.
पादुका दर्शन सोहळ्यातून बाहेर पडताना स्वतःबरोबरच समाजामध्ये सकारात्मक परिवर्तन करण्याचा विचार सोबत न्या. त्यातून पुढील जीवनात कार्यरत राहा. भक्ती-शक्तीच्या माध्यमातून राज्यभरातील देवस्थानांमध्ये इच्छा आणि दानपेटी ठेवली जाणार आहे. या दानपेटीत आपण वेळेचे, ज्ञानाचे आणि अन्य कोणते दान करू शकतो ते समर्पित करावे.
इच्छापेटीद्वारे सर्वसामान्यांच्या अपेक्षा आणि समस्यांची माहिती मिळेल. याआधारे राज्यातील जनतेला कशाची आवश्यकता आहे, ते समजेल. ही माहिती सकाळ माध्यम समूहाच्या माध्यमातून शासन आणि संबंधित क्षेत्रात काम करणाऱ्या यंत्रणेला पुरविली जाणार आहे. सामान्य नागरिकांनी इच्छा आणि दानपेटीच्या माध्यमातून नोंद करावी. त्यातून समाजाचे परिवर्तन करता येणार आहे.
समाजातील वाल्या वृत्तीत परिवर्तन होण्यासाठी शक्ती-भक्ती उपक्रम आहे.भारतीय आध्यात्मिकतेला संपन्न परंपरा, वारसा आहे. याचा वापर करून समाजाचा विकास करता येईल. आपण वास्तुशास्त्रानुसार घराची रचना करीत असतो, त्याप्रमाणे आता शहराचा विकास करताना शासनाने वास्तुशास्त्राचा विचार केला पाहिजे. यासाठी आपल्या समृद्ध ज्ञानाचा वापर केला पाहिजे. तो केला तर भारत जगाला निश्चित दिशादर्शक ठरेल, असे पवार म्हणाले.
महिलांनी पुढाकार घ्यावा
आपण ‘वसुधैव कुटुंबकम्’ म्हणतो. त्यानुसार कुटुंब पर्यायाने समाजाचा सर्वांगीण उत्कर्ष साधायचा असेल, तर भक्ती-शक्तीशिवाय अन्य मार्ग नाही. ‘वसुधैव कुटुंबकम्’ संकल्पना अधिक चांगल्या पद्धतीने समाजात रुजविण्यासाठी भक्ती-शक्तीचे प्रतीक असलेल्या प्रत्येक माता, महिलांनी पुढाकार घ्यावा, असे आवाहन पवार यांनी केले.
योग्य समन्वय साधल्यास समाजाचा विकास
भारतीय संस्कृतीमध्ये भक्ती आणि शक्ती यांचा संगम प्राचीन काळापासून दिसून येतो. भक्ती म्हणजे श्रद्धा, समर्पण आणि ईश्वरावरचा विश्वास, तर शक्ती म्हणजे सामर्थ्य, धैर्य आणि कर्तृत्व. या दोन्ही गोष्टी एकमेकांना पूरक आहेत आणि त्यांचा योग्य समन्वय साधल्यास समाजाचा विकास साधता येतो, असे पवार म्हणाले.
श्री एम यांचे आज मार्गदर्शन
समाजसुधारक, शिक्षणतज्ज्ञ, लेखक आणि जागतिक कीर्तिचे वक्ते पद्मभूषण श्री एम उद्या (ता. ९) सकाळी १० वाजता श्रीगुरू पादुका उत्सव सोहळ्यात मार्गदर्शन करणार आहेत. श्री एम आध्यात्मिक गुरू असून, ते ‘आध्यात्मिक एकांतवास’ तसेच ‘वेद’ या विषयांवर जगभरात व्याख्याने देत असतात. त्यांचे विचार ऐकण्याची संधी यानिमित्ताने भाविकांना मिळणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.