पालघरमध्ये हृदय पिळवटून टाकणारी घटना, होळीच्या दिवशीच एकाच कुटुंबातील चौघांचा मृत्यू

मुंबई: पालघरमध्ये एक हृदय पिळवटून टाकणारी घटना घडली आहे. होळीच्या दिवशीच एकाच कुटुंबातील चौघांचा आगीत होरपळून मृत्यू झाल्याची घटना समोर आली आहे. रात्री घराला लागलेल्या आगीत एकाच कुटुंबातील चौघांचा मृत्यू झाला आहे. पालघरमधील ब्राम्हण पाडा येथे ही घटना घडली. या आगीत वृद्ध आई, पत्नी आणि दोघा मुलांचा दुर्देवी मृत्यू झाला आहे. तर या आगीत मुलगा आणि दोघं नातवंडं आगीत जखमी झाले आहेत. 

रविवारी रात्री पालघर जिल्ह्यातील मोखाडा तालुक्यात ब्राम्हण पाडा या गावात ही दुर्देवी घटना घडली. अनंता मौळे यांच्या घराला ही आग लागली. समोर आलेल्या माहितीनुसार, मध्यरात्री दोन वाजण्याच्या सुमारास भीषण आग लागली. जेव्हा ही दुर्देवी घटना घडली तेव्हा घरात एकूण सात जण होते. बघताच क्षणी आगीनं रौद्ररुप धारणं केलं. शॉर्ट सर्किटमुळे ही आग लागल्याची प्राथमिक माहिती समोर आली आहे.

या आगीत घरमालक असलेले अनंता मौळे, त्यांची चार मुलं, पत्नी आणि वृद्ध आई आगीत अडकले. या घटनेत अनंता मौळे यांची दोन मुलं, आई आणि पत्नीचा जागीच होरपळून मृत्यू झाला आहे. तर अनंता मौळे आणि दोन मुलं बचावली आहेत. 

मुंबई विभागातल्या ताज्या बातम्या वाचण्यासाठी येथे क्लिक करा.

आगीच्या मोठ्या ज्वाला आणि धूर दिसू लागल्यानंतर गावकरी मदतीला धावले. रात्री आग लागल्यामुळे घरातील सर्वच सदस्य झोपेत होते. ही आग लागल्यानंतर घरातील काही सदस्यांना बाहेर पडण्यात यश आलं तर काही जणांचा या आगीत होरपळून मृत्यू झाला. 

गंगुबाई बाळू मौळे - आई (78)
द्वारका अनंता मौळे - पत्नी (46)
पल्लवी अनंता मौळे - मुलगी (15)
कृष्णा अनंता मौळे - मुलगा (10)

या चौघांचा या दुर्देवी घटनेत मृत्यू झाला आहे. 

भावेश अनंता मौळे - मुलगा (12)
अश्विनी अनंता मौळे - मुलगी (17)

हे दोघे या घटनेत जखमी झाले असून त्यांच्यावर नाशिकमधील रुग्णालयात उपचार सुरु आहेत. तर अनंता बाळू मौळे यांच्या डोक्याला दुखापत झाली असून मोखाडा दवाखान्यात उपचार सुरु आहे.

हेही वाचा- मुंबईतून आणखी पाच ड्रग्ज पेडलर्सला NCBकडून अटक

Palghar news mokhada fire incident four member died family