1 लाखाची बांगडी पोलिसांनी शोधली!

ठाणे : हिरानंदानी इस्टेट मध्ये राहणारी एक महिला गुरूवारी (ता.9) रोजी सकाळी रस्त्याने पायी जात असताना त्यांच्या हातातील सोन्याची बांगडी हरवल्याची घटना घडली होती. एक लाख रुपये किमतीची ही बांगडी सर्वत्र शोधूनही सापडली नाही. अखेर महिलेने कासारवडवली पोलीस ठाणे गाठून या घटनेची तक्रार दाखल केली. पोलिसांनी त्वरित तपासाची चक्रे फिरवून या महिलेस तिचा सोन्याचा ऐवज परत मिळवून दिला. कासारवडवली पोलीस ठाण्याचे वरिष्ठ पोलीस निरीक्षक किशोर खैरनार यांनी हा ऐवज सदर महिलेस परत केला. 

घोडबंदर रोडवरील हिरानंदानी इस्टेट येथे राहणाऱ्या आकांक्षा श्रीवास्तव या ता.9 रोजी सकाळी 9 वाजण्याच्या सुमारास भूमी एकर्स परिसरातून रस्त्याने पायी चालत जात होत्या. यावेळी त्यांच्या हातातील एक लाख रुपये किमतीची सोन्याची बांगडी रस्त्यात गहाळ झाली. सर्वत्र शोध घेऊन देखील ही बांगडी त्यांना मिळून आली नाही. अखेर आकांक्षा यांनी कासारवडवली पोलीस ठाण्यात धाव घेतली. या प्रकरणी पोलिसांनी तक्रार दाखल करून घेत तपास हाती घेतला.

ही बातमी वाचा - ...अन दहा वर्षानंतर दाखल झाला विनयभंगाचा गुन्हा

वरिष्ठ पोलीस निरीक्षक खैरनार यांनी गुन्हे प्रकटीकरण पथकाचे पोलीस हवालदार आर. एस. चौधरी व पोलीस नाईक आर. एस. महापुरे यांना घटनास्थळी पाठवून तपास करण्याचे निर्देश दिले. पोलिसांनी घटनास्थळाचे सीसीटीव्ही तपासले असता त्यात एक महिला सोन्याचा ऐवज उचलून नेत असल्याचे आढळून आले. पोलिसांनी सीसीटीव्हीत दिसणाऱ्या महिलेचा शोध घेऊन सोन्याची बांगडी परत मिळवली. ही बांगडी आकांक्षा यांना परत करण्यात आली. आपला सोन्याचा ऐवज परत मिळाल्यानंतर महिलेने पोलिसांचे मनापासून आभार मानले आहेत.