पोलिसांमुळे तक्रारदारांची मकर संक्रांत गोड

मुंबई : मुंबईच्या हार्बर, मध्य आणि पश्‍चिम रेल्वे प्रवासात गेल्या ३०, ३५ वर्षांत चोरीस गेलेला करोडोंचा मुद्देमाल आज मुंबई रेल्वे पोलिस आयुक्तालयाच्या वतीने फिर्यादींना सुपूर्द करण्यात आला. मकर संक्रातीनिमित्त आयोजित करण्यात आलेल्या या कार्यक्रमात तब्बल १०१ फिर्यादींना आपला मुद्देमाल परत मिळाला. त्यामुळे पोलिसांनी आमची मकर संक्रांत खऱ्या अर्थाने गोड केल्याची भावना फिर्यादींनी व्यक्त केली.

रेल्वेचे मुंबई पोलिस आयुक्त रवींद्र सेनगावकर यांच्या हस्ते मुद्देमाल देण्यात आला. मुंबई रेल्वेतून रोज किमान ८० ते ९० हजार प्रवासी प्रवास करतात. प्रवासादरम्यान अनेक नागरिकांचे मोबाईल, सोन्याचे दागिने, रोख रक्कम किंवा पर्स चोरी होतात. १९८६ पासून २०१९ पर्यंत रेल्वे प्रवासात चोरीस गेलेला मुद्देमाल रेल्वे पोलिसांनी तपास करत

आरोपींकडून जप्त केला होता. मंगळवारी (ता. १४) तो फिर्यादींना परत देण्यात आला.
घाटकोपर पूर्वमधील पंतनगर रेल्वे पोलिस कवायत मैदानात हा कार्यक्रम पार पडला. या वेळी जप्त करण्यात आलेल्या एकूण मुद्देमालाची किंमत एक कोटी पाच लाख रुपये एवढी होती. यात दोन किलो २८२ ग्रॅम वजनाचे सोन्याचे दागिने, चांदी ९१ ग्रॅम, पाच लॅपटॉप, एक लाखाची रोख रक्कम, दीड लाख किमतीचा कॅमेरा आदींचा समावेश होता.

महत्त्वाची बातमी : आर्थिक मंदिमुळे इतक्या लाख नोकऱ्या झाल्या कमी...