‘नो एंट्री’ आदेशाला स्थगिती, कल्याण-डोंबिवली पालिका आयुक्तांची माहिती

कल्याण : कल्याण-डोंबिवली शहरात राहणाऱ्या आणि मुंबईत सरकारी तसेच खासगी रुग्णालये आणि शासकीय कार्यालयांमध्ये काम करणाऱ्या तसेच खाजगी आस्थापना,  बँकेत काम करणाऱ्या नागरिकांना 8 मेपासून पालिका क्षेत्रात प्रतिबंधित करण्याचा आदेश कल्याण-डोंबिवली पालिका प्रशासनाने स्थगित केला आहे. या नागरिकांची मुंबईत निवास व्यवस्था होण्यासाठी काही काळ लागणार असल्यामुळे पुढील निर्णय होईपर्यंत हा आदेश स्थगित करत असल्याची माहिती पालिका आयुक्त डॉ. विजय सूर्यवंशी यांनी दिली.

हे ही वाचा : प्रशासनाला सुनावलं, क्वारंटाईन करण्याबद्दल मुंबई हायकोर्ट म्हणतंय...  

कल्याण डोंबिवली सह उल्हासनगर,  अंबरनाथ,  बदलापूर या परिसरातील लोकप्रतिनिधींकडून मागील काही दिवसांपासून मुंबईतून येणाऱ्या स्थानिकांची कामाच्या ठिकाणाजवळ निवास व्यवस्था करावी अशी चर्चा करण्यात येत होती. कल्याण-डोंबिवली पालिकेने याबाबत 5 मे रोजी निर्णय घेत 8 मेपासून त्याची अंमलबजावणी करणार असल्याचे जाहीर केले. परंतु इतक्या मोठ्या प्रमाणावर मुंबई शहरात निवास व्यवस्था करण्याच्या दृष्टीने जास्त कालावधी लागू शकत असल्याने पालिकेला हा आदेश स्थगित करावा लागला. शहरातील जे नागरिक मुंबईत कामानिमित्त जात आहेत, त्यांनी आपली माहिती पालिकेला द्यावी असे आवाहन पालिका प्रशासनाने केले आहे.

महत्वाची बातमी : यंदा पावसाळ्यात मुंबईकरांना कोरोनासोबत 'या' परिस्थितीचा देखील करावा लागणार सामना?

समाज माध्यमांवर चर्चेला उधाण 
या निर्णयावर समाज माध्यमांवर उलट सुलट प्रतिक्रिया देत ज्या नागरिकांना पालिका क्षेत्रात येण्यास बंदी केली आहे. त्या नागरिकांनी आयुक्तांना आवाहन करून आम्ही आपलेच नागरिक, करदाते नागरिक आहोत याची आठवण करून दिली. तसेच अशाप्रकारचा निर्णय घेण्यापूर्वी पालिका प्रशासनाने लोकप्रतिनिधींना विश्वाासात घेतले होते का?  असा सवालही काहींनी केला. मुंबईत कामानिमित्त जाणाऱ्या नागरिकांसाठी एस टी महामंडळ तसेच बेस्ट प्रशासनामार्फत व्यवस्था करण्यात आली आहे. परंतु या बसमधून अनेकदा मोठ्या संख्येने कर्मचारी प्रवास करतात. यातूनही संसर्ग होऊ शकतो अशी भीतीही काही कर्मचाऱ्यांनी व्यक्त केली आहे.

Postponement of No Entry order in Kalyan-Dombivali Information of Municipal Commissioner