प्रभाकर साईल मुंबई पोलिसांच्या चौकशीला राहणार हजर

मुंबई: आर्यन खान ड्रग्ज प्रकरणात (Aryan khan drug case) २५ कोटी डीलचा आरोप करुन खळबळ उडवून देणारा प्रभाकर साईल (prabhakar sail) आज मुंबई पोलिसांच्या चौकशीला हजर राहणार आहे. प्रभाकर साईल कार्डीलिया क्रूझ ड्रग्ज प्रकरणातील एक पंच आहे. शाहरुखचा मुलगा आर्यनच्या सुटकेसाठी २५ कोटीची मागणी केल्याचा आरोप साईलने केला होता. त्याच्या या गौप्यस्फोटानंतर मुंबई झोनलचे संचालक समीर वानखेडे (sameer wankhede) यांच्या विश्वासहर्तेबद्दल गंभीर प्रश्नचिन्ह निर्माण झाले होते.

प्रभाकर साईल आज NCB च्या चौकशीला उपस्थित राहणार नाही. पण प्रभाकर साईल मुंबई पोलिसांच्या चौकाशीला उपस्थित राहणार आहे. दुपारी 3.30 वाजता प्रभाकर साईल उपस्थित राहील. प्रभाकर साईलला NCB चे समन्स नसल्याने NCB चौकशीला जाणार नाही.

प्रभाकर साईल किरण गोसावीचा अंगरक्षक आहे. आज सकाळीच मागच्या काही दिवसांपासून फरार असलेल्या गोसावीला पुणे पोलिसांनी अटक केली. तो सुद्धा आर्यन खान ड्रग्ज प्रकरणात पंच आहे. प्रभाकर साईलने केलेले आरोप किरण गोसावीने फेटाळून लावले आहेत. तसंच प्रभाकर साइल हा खोटं बोलत असल्याचंही किरण गोसावीने म्हटलं आहे.

"एनसीबीने चौकशीसाठी कोणतेही समन्स बजावलेलं नाही. एनसीबीने मीडिया ट्रायल करू नये. रीतसर एनसीबीने समन्स द्यावं" असं प्रभाकर साईलच्या वकिलाने म्हटलं आहे. "एनसीबी 8 तास का थांबले होते ? गुन्हा दाखल करायला कोणती डील होत होती का? अजून तरी एनसीबीने आम्हाला चौकशी साठी बोलवलेलं नाही. मुंबई पोलिसांनी बोलावलं, तर आम्ही चौकशी साठी जाऊ" असे प्रभाकरचे वकील तुषार खंदारे म्हणाले.