रायगड जिल्हा कोरोनामुक्तीच्या दिशेने; कोरोना रुग्णसंख्या १० पेक्षा कमी

अलिबाग : रायगड (Raigad) जिल्ह्यात कोरोनाचे दर दिवशी सरासरी आठ रुग्ण सापडत आहेत. ही साथ आता पूर्णत: नियंत्रणात येत असल्याने लवकरच जिल्ह्यात रुग्णसंख्या (corona patients) शून्य होण्याची शक्यता वर्तविण्यात येत आहे. सध्या जिल्ह्यात केवळ १० बाधितांवर रुग्णालयात उपचार सुरू आहेत. यामुळे आरोग्य विभागाला दिलासा मिळाला आहे. कोरोना रुग्णांची संख्या कमी येत असल्याने जिल्ह्यातील निर्बंध (corona restrictions) हटवण्यात आले आहेत. सर्व व्यवहार पूर्वीप्रमाणे सुरळीत सुरू झाले असल्याने येथील नागरिक समाधान व्यक्त करीत आहेत.

कोरोनाचा फैलाव होऊ नये यासाठी मास्क, हाताची स्वच्छता, सामाजिक अंतर पाळण्याच्या सूचना केल्या जात आहेत. कठोर निर्बंधांना वैतागलेल्या येथील नागरिकांना मोठा दिलासा मिळाला आहे. कोरोना प्रतिबंधक लसीकरणही बहुतांश नागरिकांचे झाले असल्याने आरोग्य केंद्रासमोर रांगा दिसत नाहीत. जिल्हा आरोग्य अधिकारी डॉ. सुधाकर मोरे यांनी सांगितले की, रुग्ण संख्या कमी होत आहे. शून्य मृत्यूची स्थिती यापूर्वीच झाली आहे. मात्र असे असतानाही कोरोनाच्या त्रिसूत्रीचा वापर करून संसर्ग टाळण्यासाठी प्रयत्न करणे गरजेचे आहे.

लसीकरणावरील दृष्टिक्षेप

पहिला डोस- २२०५२१०
दुसरा डोस - १९६६०३१
मुलांचे लसीकरण- १५२६७२
१८-४४ वयोगटातील- ९०३३५४
४५-६० वयोगटातील-९०३३५४
६० च्या पुढील-५५११६७

रुग्ण संख्येवर दृष्टिक्षेप

नवे रुग्ण- ८
बाधित रुग्ण- १८३
उपचाराधिन रुग्ण- १०
एकूण मृत्यू - ४६९३
एकूण बाधित रुग्ण- २१४५९९