Railway Crime: रेल्वेत नोकरी लावण्याच्या बहाण्याने जळगावच्या तरुणाची मुंबईत फसवणूक

Railway News: रेल्वेत उद्‌घोषक पदावर नोकरीला लावण्याच्या बहाण्याने जळगाव येथील आशीष पाटील (वय ३२, रा. पाचोरा) याला रेल्वेचे बनावट नियुक्तिपत्र देऊन त्याच्याकडून २५ हजार रुपये उकळल्याचा प्रकार उघड झाला आहे.

डॉ. एम. के. शहा व संदीप पाठक अशी फसवणूक करणाऱ्यांची नावे आहेत. सीबीडी पोलिसांनी या दोघांविरोधात फसवणुकीचा गुन्हा दाखल करून त्यांचा शोध सुरू केला आहे.

आशीषचे विज्ञान शाखेत पदवीपर्यंत शिक्षण झाले असून तो नोकरीच्या शोधात होता. बेलापूर येथील डॉ. एम. के. शहा यांचा मित्र संदीप पाठक हा रेल्वेमध्ये नोकरीला असून तो रेल्वेमध्ये उद्‌घोषकपदावर नोकरी लावून देत असल्याची माहिती आशीषला त्याच्या मित्राने दिली होती.

त्यानुसार आशीषने शहा यांना संपर्क साधून चौकशी केली असता डॉ. शहा यांनी त्याला रेल्वे विभागातील या नोकरीसाठी २५ हजार रुपये आधी द्यावे लागतील. तसेच काम झाल्यानंतर बाकी पैसे द्यावे लागतील, असे सांगितले होते.

२७ नोव्‍हेंबरला नियुक्तिपत्र तयार झाल्याचे सांगून त्याला बेलापूरला बोलावले. तेथे एका तरुणाने नियुक्तिपत्र न देता मोबाईलवर त्याचे छायाचित्र काढून घेण्यास सांगितले.

त्यानंतर आशीषला प्रशिक्षणासाठी पाठवण्यात आल्यानंतर त्याच्याकडे असलेले नियुक्तिपत्र बनावट असल्याचे त्याला समजले. फसवणूक झाल्याचे लक्षात येताच आशीषने सीबीडी पोलिस ठाण्यात धाव घेऊन तक्रार दाखल केली.